Earthshot Prize winner-te chu...

Duke of Cambridge Prince William-a Earthshot Prize, khawvel chhe zel tur venhimna kawnga thawh hlawkte chawimawina hun chu Pathianni liam ta khan hman a ni ta a, chawimawina dawngtu zingah hian Costa Rica ram pawh a tel.

Earthshot Prize hi category pangaah ṭhen niin category tina lawmman dawngtute chuan $maktaduai 1 an dawng tel ṭheuh a ni.

Chawimawina hlanna ceremony-ah chuan Prince William bakah Emma Watson, Dame Emma Thompson leh David Oyelowo-te pawh an tel a, Ed Sheeran, Coldplay leh KSI-te pawh perform zingah an tel bawk. An perform-na atana power an mamawh chu cyclist 60-te'n an lo siam a ni nghe nghe.

He award hi UN Sustainable Development Goals nena inthlawp tawnin award dawng turte chu Earthshot Prize Council- Duke leh Attenborough bakah continent hrang hrang paruk aṭ anga thlan chhuahte'n an thlang a ni.

Chawimawina dawngtute leh an dawnna category chu:-
1 Protect and Restore Nature - The Republic of Costa Rica
Costa Rica ram hian an rama ramngaw te an tichhe nasa hman hle a. Mahse, tunah chuan thingphun nasa taka uarin ram dang tana entawn tlak khawpin hma an la leh tawh a ni.

2 Clean our Air - Takachar, India
Khawl kenkual theih, agricultural waste-te leiṭhaa chantir leh theihna siam chhuaktu niin, loneitute'n an hnawm hnawkte hal loa leiṭhaa an chantir lehna an siam.

3 Revive our Oceans - Coral Vita, Bahamas
Ṭhian ṭha tak pahnihina project an kalpui niin, Bahamas-a coral ṭotir lehna kawnga hmalakna, coral reefs mang mai tur venna tur a ni. Tank danglam tak hmanga coral a let 50-a ṭo chaktir theihna an siam chhuak a ni.

4 Build a Waste-Free World - The City of Milan Food Waste Hubs, Italy
Chaw leh eitur bang leh ei lohte lakhawma mamawhtute hnena pekna kawnga hmanlakna niin, hei hian chawnawi paih a tihtlem bakah mi tam tak rilṭama awm mai turte a ṭanpui a ni.

5 Fix our Climate - AEM Electrolyser, Thailand/Germany/Italy
Renewable energy hmanga hydrogen siamna a ni a, tui hi hydrogen leh oxygen-ah an ṭhenhrang a ni.