The Duke and Duchess of Sussex ; Prince Harry & Meghan Markle pum khat an ni ta

Prince Harry (33) leh Meghan Markle (36) te chu Inrinni khan St. George Chapel, Windsor Castle-ah Queen Elizabeth II leh sawm bik mi 600 vel hriatpuiin an inkutsuih ta. Nupa tuaktharte hi 'The Duke and Duchess of Sussex' title pek an ni.

Duke and Duchess of Sussex-te hi Archbishop of Canterbury, Justin Welby chuan rinawmna thu a tiam tir a, duhsakna a hlan nghal bawk. Nupa tuakthar lawmpuitu zingah milar pawh an fuankhawm ṭhahnem hle.

An inneihna hmun Windsor Castle chhehvelah chuan mi 1,00,000 vel zet an pung khawm a, TV aṭangin mi maktaduai tam takin an thlir bawk.

Ceremony
Archbishop of Canterbury, Justin Welby chuan ceremony a kaihruai a, nupa tuak tharte hi ṭawngṭaisak bawk. American Episcopalian Church Bishop, Michael Curry chuan thuchah a sawi a, Kingdom Choir-ten 'Stand by Me' tih hla an rem.

Mo thuam
Markle chuan gown var sei ṭha zet mai a din­chhuahpui a, a hmuna awm­te leh TV lam aṭanga lo thlirtute mit a la kher mai. Hei hi French fashion house Givenchy-a hmeichhe Artistic Director hmasa ber British designer Clare Waight Keller kutchhuak niin, a mawi tawk chauha chei bawl a ni. Silk aṭanga siam white gown hi feet 16 zeta sei a ni!

Hetih lai hian Prince Harry leh a unaupa Duke of Cam­bridge, Prince William te chuan frockcoat uniform, Blues leh Royals an inbel thung a ni.

Sap chibai
Prince Harry leh Meghan Markle te hi hunserh hman zawh a nih hnu, St. George Chapel aṭanga an chhuahin an mahni lo lawmtu mipui tam tak hmaah an inhmangaihna lantir nan 'sap chibai'-in an inchibai a ni.

Lawmthu sawina
Buckingham Palace chuan lawmthu sawina an tarlang nasa hle a, duhsakna hlantute chungah thinlung taka an lawm thu an sawi. "Inneih min lawmpuitute zawng zawng chungah lawmthu kan sawi a ni. Khawvel hmun hrang hrang aṭanga Duke and Duchess of Sussex te lawmpui tura Windsor pankhawmtute, in chungah lawmthu kan sawi e," tiin an tarlang.

Zungbun chu
Prince William chu inneih zungbun nen a pen chhuak a, a nau Prince Harry chuan lain hlim hmel pu chungin Markle a buntir a, Markle pawh hian zung­bun a buntir ve bawk. Zungbun an inbuntir hnu hian Archbishop of Canterbury chuan nupa an ni ta tih a puang ta a ni.

He mi hnua reception an neih dawnah Harry chuan a nu Princess Diana zungbun chu a nupui Markle hi a kut ding lamah a buntir leh a ni.