BTS an langsar

Rimawi lama chawimawina sem chuah zinga ngaihlut hlawh ber pawl Billboard Music Award chu Pathianni khan MGM Grand Arena, Las Vegas-ah sem a ni leh ta. Ed Sheeran chu mimala award dawng hnem ber niin, Korean boy band BTS chu a langsar ber tih ngam an ni.

Award ceremony hi Kelly Clarkson chuan a host a, a hnehsawh viau. Taylor Swift, Shawn Mendes, Bruno Mars leh Kendrick Lamar te lansarhna ceremony hi TV aṭanga thlirtu pawh an ṭhahnem hle.

Bul ṭanna
Host Kelly Clarkson chuan Medley-in bul a ṭan a, Maren Morris hla 'My Church' nen a ding chhuak. American singer hian Kendrick Lamar, Ed Sheeran, Swift, Mendes, Bruno Mars hla 'Finnes' thlengin a hrut kual! Show tir lamah hian Santa Fe, Texas-a school-a inkahna thlenga vanduaina tawkte pualin hun hman a ni. Clarkson hi vanduaina tawkte puala hun hman a nih lai hian a mittui a tla hial a ni.

Arina Grande chuan boruak nung sa a vuak hot belh a, a bul ṭanna a fuh hle. Pop star Arina hian a hla hit 'No Tears Left to Cry' a sa a, a perform a hmuhnawm hle. A hnunga zaithiam inlante an che ṭha bawk a, show pui tak a ni. Arina bakah hian Shawn Mendes, Khalid, John Legend, Ed Sheeran, Janet Jackson leh midang eng emaw zat an zai.

Camila Cabello leh Pharrell Williams te an perform dun a, Mack­lemore - Kesha, Zedd - Maren Morris - Grey, Jennifer Lopez - DJ Khaled, Christina Agui­­lera - Demi Lovato leh midang che vel a hmuhnawm hle bawk.

Langsar zual
English singer Ed Sheeran chu mimala langsar ber a ni a, award paruk zet a hum haw. 'Shape of You' singer hian award ngaihlut hlawh - Top Artist, Top Male Artist, Top Song Sales Artist leh Top Hot 100 Artist te a dawng a, heng bakah hian Top Radio Songs Artist atan thlan niin, a hla hit 'Shape of You' chu Top Radio Song atan thlan a ni ba wk.

American rapper Kendrick Lamar chu ṭum dang ang bawkin a langsar leh a, 'DAMN' album a hlawhtlinpui zui zel. Lamar hian award panga a dawng a, chung zingah chuan - Top Rap Artist, Top Rap Album leh Top Rap Male Artist te a tel a, rap category a thunun hneh hle.

Billboard Music Award sem a nih tawh chuan Taylor Swift hming a langsar ṭhin. Kuminah pawh kum dang angin che ṭha tawk lo mah se, a langsar ber pawl a ni leh. Swift hi Top Female Artist atan thlan niin, nikum November thlaa a tichhuah 'Repution' album hmangin Top Selling Album award a dawng bawk. Hetih lai hian kum 20 mi lek Khalid chu Top New Artist atan thlan niin, award hlu tak a hawn bawk.

Award sem a nih tawh chuan 'Despacito' singer ten award an hum haw tlangpui a, tun ṭumah pawh Luis Fonsi, Daddy Yankee leh Justin Bieber te hming a mawi leh. 'Despacito' hian - Top Streaming Song (video), Top Selling Song, Top Collaboration leh Top Latin Song te a hui fai vek a ni.

BTS an vul
BTS an lar laklawh a, MGM Grand Arena-a zaithiam rual zingah pawh lawm hlawh ber pawl an ni. BTS hian award ngaihhlut hlawh ber pawl Top Social Artist award an dawng a, chawimawina hlan an nih lai hian entu mipui lam thawm a ring hle. Award ceremony-ah hian an perform bawk a, 'Fake Love' hla an sa a ni.

Korean boy band hi award ceremony-a lawm hlawh ber tih ngam an ni a, back stage lamah Taylor Swift pawn thla a lakpui a, social media lamah a darh nasa hle.