Infinity War nek chhuaktu 'Deadpool 2'

Box Office-ah roreltu thar a piang ta a, chu chu 'Avengers: Infinity War' nek chhuaktu, Marvel film tho 'Deadpool 2' a ni.

May 15-a tlangzarh fantasay film hian $mtd 125 zet lalutin Box Office-ah No. 1 a hauh mek.

Deadpool 2 hian tlangzarh hnuah khawvel hmun hrang hrang aṭangin $mtd 300 chuang zet a lalut tawh a, US bikah chuan $mtd 125 a thawk chhuak tawh a ni. Hetih rual hian Deadpool chhuak hmasa chu tlangzarh kara sum lakluh tam lamah a tluk lo a, kum 2016-a tihchhuah hian $mtd 132.4 zet lalut thei a ni.

Box Office-a hun rei tak chhung vawk lal len tawh 'Avengers: Infinity War' chuan $mtd 29 lalutin pahnihna a hauh. April thlaa tlangzarh Infinity War hi Deadpool 2 inlar hma zawnga roreltu a ni a, sum a lalut hnem rem rem hle. Box Office aṭanga a lakluh tawh zat chu $tld 1.6 zet a tling tawh a, kumina film chhuak tawh zingah chuan hlawhtling ber tihngam a ni.

Kumina film chhuak tawh zingah Infinity War bakah hian, Black Panther chu sum lalut hnem a ni a, Deadpool 2 pawh hi beisei a sang leh hle a, an vai hian Marvel comic behchhana siam vek an ni.

Tun ṭumah hian comedy film Book Club chu sum lalut tam pathumna a ni a, $mtd 13 a thawk chhuak. He film hi tun hnai lawka tlangzarh niin, sum lakluh kawngah a che ṭha nghal hle.

Comedy film dang Life of the Party pawh sum lalut tam zual zingah telin, top 5-ah a lang phak. Kar liam ta chhung khan $mtd 7 lalutin, Breaking In chungah a awm.

Top 10-ah hian Show Dogs chu a ṭum khat nan a lang a, hei pawh hi tun hnaia chhuak thar tho a ni. Show Dogs bakah hian A Quiet Place leh Rampage te chu an la lang ve leh bawk. Heng film pahnihte hi Box Office-ah an lang rei ta viau a, entu an tlahniam tak tak thei meuh lo a ni.