India rama zaipawl ṭha ber Mizo Cardinal Choir

Musica Mundi-in zaipawl ṭha ranking a tihchhuah tharah Mizo Cardinal Choir chu India No.1 an ni a, khawvel pumah 263 an hauh phak bawk.

India ramah zaipawl ṭha tak tak eng emaw zat an awm a, chung zingah chuan Mizo Cardinal Choir te hian a ber nihna an hauh thei a ni. India rama zaipawl lar ber tih hial ngam Shillong Chamber Choir te pawh an awm lai a, Mizo Cardinal Choir ten a ber nihna an hauh thei hi a nep lo hle.

Mizo Cardinal Choir hi nikuma Colombo-a Asia Pacific Choir Games-ah khan an tel a, Vocal Ensemble Category-ah pakhatna an ni. Hemi ṭum hian an che ṭha hle a, lawm pawh an hlawh hle a ni.

June 4 aṭanga ṭan tur World Choir Game 2018-ah pawh tel tumin an inbuatsaih leh mek bawk. World Choir Game hi South Africa-ah neih a ni dawn a, Musica Mundi ranking-a top 500 te chu an tling chiang sa an ni. He hunah hian khawvel hmun hrang hrang aṭangin zaipawl ṭha hnem tak an fuan­khawm ang.

Mizo Cardinal Choir hian nikum khan Zo Rimawi Award-ah Choir of The Year atan thlan an lo ni tawh bawk.