Billboard 200 chart chung berah Drake a rawn kir leh

Billboard 200 chart-ah Drake album thar ber 'Certified Lover Boy' chu a rawn invawrh leh. Hot 100 chart lamah roreltu thar an awm a, Lil Nas X & Jack Harlow 'Industry Baby' chu pakhatna a ni.

'Certified Lover Boy' bawk
Canadian rapper Drake-a studio album parukna 'Certified Lover Boy' hi September 3-a tlangzarh tawh kha niin, kar thum chhung a zawnin Billboard 200 chart-ah hian pakhatna a lo ni tawh a, he album hmang hian Drake hian record ṭha tak takte pawh a lo siam tawh a ni.

Tichuan, kar hnih chhung pakhatna a nih loh hnuah chart thar berah erawh equivalent album unit 94,000 hmu chhuakin pakhatna a rawn ni leh ta.

'Certified Lover Boy'-ah hian hla 21 awmin heng hla zawng zawngte hi Billboard Hot 100 chart chanve chunglama awm vek tawh a ni a, US mipuite hian Drake album thar hi an ngai hlu rem rem hle a, tlangzarh aṭangin thla khat chuang liam tawh mah se kar hmasa chhung pawh khan an album ngaihthlak nasat ber a la ni pha.

Don Toliver album thar 'Life of A DON' chu pahnihna a ni thung a, chart topper pawh lo ni tawh Youngboy Never Broke Again 'Sincerely, Kentrell' chu pathumna a ni thung.

Kar hmasa lama pakhatna rawn ni leh zuai Taylor Swift 'Fearless (Taylor's Version)' erawh 35-naah a awm leh daih tawh a ni.

Hot 100 lamah Lil Nas X & Jack Harlow-te'n ro an rel
Billboard Hot 100 chart lama The Kid LAROI & Justin Bieber 'Stay' rorelna tihtawpin a awm ve ta a, Lil Nas X & Jack Harlow 'Industry Baby' chu pakhatna a ni ve thung.

He hla hi Lil Nas X studio album hmasa ber 'Montero'-a mi kha niin August thlaah khan Hot 100 chart-ah hian pahnihna te pawh a lo ni zak zak tawh a, tunah erawh pakhatna a ni ta a ni. Jack Harlow chu he hla hmang hian vawi khat Hot 100 chart topper a ni ve ta bawk.

The Kid LAROI & Justin Bieber 'Stay' chu Hot 100 chart-ah pahnihna a ni ve thung a, he chart-ah hian kar 14 lai cham tawhin vawi eng emaw zat pakhatna a ni tawh. Walker Hayes chuan 'Fancy Like' hmangin top 3 a khar ve bawk a ni.

Artist 100 lamah pawh Drake
Billboard Artist 100 chart-ah Drake bawk pakhatna a ni leh a, he chart-ah hian vawi 36 zet pakhatna a ni ta.

Tleirawl duhawm Olivia Rodrigo chu pahnihna a la ni thei a, British singer Ed Sheeran chu pathumna a ni thung.