Squid Game vangin NETFLIX subscriber an pung?

NETFLIX chuan Thawhlehni khan thuchhuah siamin kumin third quarter chhungin subscriber maktaduai 4.4 zet an neih belh a, hei hi Squid Game nasa taka a lar vanga ngaih a ni.

Nikum lamah khan hripui leng vanga mi tam tak in lama an tawm avangin Netflix subscriber pawh an pung nasa hle a, mahse kumin kum chawhma lamah erawh nasa takin a tlahniam leh a ni. Thawhlehnia thuchhuah an siamah erawh July leh September inkar ringawt khan mtd 4.4-in an subscribe thar leh a, tunah hian khawvel pumah Netflix hian subscriber mtd 213.6 zet a nei der tawh!

South Korean drama Squid Game hi September 17 khan tihchhuah ṭan a ni a, thla khat chhungin chhungkaw mtd 142-in an en hman a, NETFLIX series hit ber a ni nghal. Hemi a nih avang hian tun quarter kan hman leh mekah pawh hian NETFLIX subscriber hi an pun leh viau rin a ni a, kum tawp a nih meuh chuan subscriber mtd 8.5 vel an awm belh hman rin a ni.