'The Voice' season 14 winner Brynn Cartelli
American television series 'The Voice' season 14 chu zawhfel a ni leh ta a, Brynn Cartelli chu winner a ni. Kum 15 mi Brynn Cartelli hi winner ni thei naupang ber niin, $100,000 a dawn bakah, Universal Music Group-in inremna an ziahpui bawk.
The Voice hi Thawhlehni zan khan Grand Finale neih a ni a, contestant pali an inlan. Thawhṭanni khan Grand Finale lut mi pali te hming hi puan a ni a, Telephone, internet, text leh iTunes store aṭanga mipui vote hmu hnem ber Brynn Cartelli chuan hnehna a chang ta a ni. Brynn Cartelli hi 'Team Kelly' niin, intihsiak chhung zawng hian a che ṭha tluang hle.
Spensha Baker chu palina a ni a, Kyla Jade chu pathumna niin, Britton Buchanan chu pahnihna a ni. Britton Buchanan leh Brynn Cartelli te hian a ber nih an inchuh a, result puan dawn hian an zam dun hle tih an hmelah a lang. A tawpah hmeichhie zawk Brynn Cartelli hi a ding chang ta a ni.
The Voice-ah hian contestant-te chu team hrang hrangah ṭhen an ni a, top 4-a inhlangkai - Jade leh Baker te hi 'Team Blake' an ni a, Buchanan chu 'Team Alicia' niin, Adam Levine nauten final an lut zo lo thung.
Grand Finale zan hian Dua Lipa chu a perform a, 'IDGAF' a sa. Ani bakah hian country singer Kane Brown a inlan a, James Baker leh judge zinga mi Alicia Keys te chu an zai dun bawk. Season 13 winner Chloe Kohanski chu finale zana mipui lawm ber pawl a ni a, 'Come This Far' tih hla a sak laiin, mipui thawm a ring hle. Carson Daly chuan show hi a host a, Jason Aldean, James Bay, Big Sean leh Halsey te an perform bawk.
The Voice season 14-ah hian Adam Levine, Blake Shelton, Kelly Clarkson leh Alicia Keys te chu judge an ni.
Brynn Cartelli
• April 16, 2003 khan Longmeadow, Massachusetts (USA)-ah a piang
• Kum li mi lek a nih lai aṭangin a zai ṭan
• Kum ruk mi a nihin Longmeadow High School-ah music a zir
• Kum 12 a nihin ama pualin hla pahnih a tichhuak
• 2016 khan New England Revolution home game-ah National Anthem a sa a, hemi ṭum hian mi 1,500 aṭanga thlan chhuah pathum zingah a tel a ni.
• The Voice season 14 winner a ni
• Amah hi USA Field Hockey Player a ni bawk!