Zuckerberg-a'n thupha a chawi

Facebook founder leh CEO ni bawk Mark Zuckerberg chu Brussels-a European Parlia­ment-ah May 22 khan a inlan a, tun hnaia an company hming­chhiatnaah mawhphurtu a nih thu sawiin, member-te hmaah thupha a dil.

Zuckerberg hi European Parliament-ah hian Cambridge Analytica scandal chungchang sawifiah turin a inlan a ni. Facebook CEO chuan, "Chanchinthar dik lo tam tak a darh a, ram hnuk khawih thei thil thlengin a darh a ni. Information hrang hrang darhah hian mawhphurtu ka ni." tiin, European lawmaker-te hmaah thuchah a sawi.

Kum 2016-a U.S. president thlan khan facebook hmangtu mi maktaduai tam takte in­formation chu dik lo taka lakhawm a nih thu tun hnaiah a darh a, company lamin dem an hlawh hle. Cambridge Analytica scandal a lar hnu hian dem an hlawh zual a, facebook a him tawk lo nia ngaihna a lian hle a ni.

Company lam chuan chinfel tumin hma an la mek a, kumin chhungin account maktaduai 200 vel zet an titawp tawh a ni.