Grammy-ah major category aṭangin 'urban'an paih

Recording Academy chuan Nilaini khan thuchhuah siamin Grammy-ah major category aṭangin 'urban' an paih.

Rimawi huanga chawimawi­na ngaihhlut Grammy Award buatsaihtute chuan an inkaih­hruaina dan thlak dang­lamin an award category-a black music sawina atana an hman 'urban'  chu an paih dawn ta a ni. 

Republic Records pawhin kar hmasa lamah khan 'urban' tih chu an hmang tawh dawn lo tih an lo puang tawh a, Recording Academy lam pawh hian Republic Records hnungzui hian paih ve a nih tur thu an puang ve leh ta a ni.

'Best Urban Contemporary Album' category chu 'Best Progressive R&B Album' tiin an thlak a, hemi huangah hian R&B lam hawi music, hip-hop, rap, dance leh electronic music-te pawh telin an dah ang.

'Best Rap/Sung Performance Category' chu 'Best Melodic Rap Performance' tiin an thlak thung.

Recording Academy interim president leh CEO Harvey Mason Jr chuan,"Kum eng emaw zat kan ngaihtuah tawh a ni a, hun eng emaw chen chu he thumal hi 'hit button' a ni tawh," tia sawiin,"Creator leh midang tam tak khami genre huang chhunga awmte khan a hrilhfiahna kha an duh lo a, music style hrangah an ngai a ni. Chung community-te ngenna ang chuan vote ka la ta a ni," a ti.

Grammy Award hi kum 61 liam ta, May 4, 1959 khan a vawi khatna atan sem a ni a, 2020 Grammy Award kha a vawi 62-na niin kumtir lamah sem ṭhin a ni.