World of Dance-ah 'Zo Nation' an che ṭha ; Best Costume atan thlan an ni

Dance industry-a platform lian ber pawl ni chho mek, World Of Dance (WOD) intihsiaka tel tur zawnna chu May 25, Zirtawpni zan khan Chennai-a Madras Music Theatre-ah neih a ni a, Zo Nation-te an che ṭha hle. Mizo Dance Camp hnuaia awm Zo Nation-te hi Best Costume atan thlan an ni - an thawmhnaw hi Vakiria kut chhuak a ni.

WOD India qualifier-a tel tur hian Zo Nation hi online audition kal tlangin North East Region aiawh tura thlan chhuah niin, ram chhung hmun hrang hrang aṭanga lam thiam inel zingah an tel a ni. India aiawh turin tling zo ta lo mah se, an vawi khat telnaah kut ruakin an lo haw lo.

Best Costume atan thlan an ni a, an kawr hi a var leh Mizo puan inchawhpawlh niin, Vakiria kutchhuak a ni. WOD-a an vawi khat telnah hian hnam dang zingah pawh an zahpuiawm lo. An tel satliah a ni lo a, Mizoram hming an tihṭhat bakah, hmarchhak aṭanga tel thei awm chhuan an ni bawk. Best Costume atana thlan an ni hi hlawhtlinna a tling a, Chennai lama Zo hnathlak awmte pawhin an ṭawiawm ṭha hle a ni.

Intihsiak chu
WOD-ah hian division hrang hrang awmin, team division bakah junior leh singles division-te a awm. Team division hi ngaih hlut ber niin, Zo Nation-te pawh hi he category-ah hian an tel.

A pumpuia pakhatna chu OPM Crew, Chennai niin, anni hian Los Angeles, California-a World Final neih turah India ai an awh dawn a ni.

World of Dance
American reality competition series WOD hi kum 2008 khan USA-ah din a ni a, khawvel huapa lam ṭhiam ber berte tualchaina a ni.

Jenna Dewan chu host niin, judge pawh an hrawl hle a, Jennifer Lopez, Ne-Yo leh Derek Hough te an ni nawk. Jennifer Lopez hi executive producer a ni bawk.

Ram hrang hrang aṭanga lam thiam fuankhawmnaah hian sum pawh a tam hle. India aṭang pawhin hlawhtlinna chang an lo awm tawh a, Desi Hoppers, Mumbai-te chu kum 2015 khan Los Angeles-ah world champion an lo ni tawh a ni.

WOD-a inlan tur thlanna hi India bikah chuan nikum aṭang khan mumal taka kalpui niin, khawpui lian Chennai leh Mumbai-ah te neih a ni tawh.

Mizo Dance Camp
MDC hian hnuhma ṭah tak tak an lo hnutchhiah tawh a, tun ṭuma fehchhuak Zo Nation pawh hi an hnuaia mi a ni. Zo Nation-ah hian member pariat an awm mek a, MDC creative director Alan Rinawma chuan a kaihhruai a ni.

Member-te hi Alan bakah Lalchenpuia, Edson Lalmuan-kima, Mark Lalnuntluanga, Glimmer Chhandami, Marina Khawlhring, Priscilla Vanchhawng leh Regina Lalawmpuii te an ni.

MDC hian June 4 aṭang hian summer intensive an ṭan leh dawn a, thla khat chhung a awh ang. He hunah hian dance class bakah, showcase, showdown jam leh team audition an buatsaih leh dawn a ni. Mizoram pawn thlenga inphochhuah an tum.

Mizo Dance Camp ten 'Despa­cito' an cover chu YouTube lamah pawh entu an ṭhahnem hle a, Mizo video siam tawhah chuan entu ngah ber a ni hial.