Cancer hnehtu Rockstar-te

Cancer hi natna hlauh­awm tak, mi tam takin an thihpui leh a damdawi mumal mithiamte pawhin an hmuh chhuak theih loh a nih laia rockstar zingah cancer hnehtu  eng emaw zat an awm.

Kum tinin June Pathianni hmasa ber hian United States chuan  National Cancer Survivors Day-an hmang ṭhin a, hemi pual hian rock magazine Loudwire chuan rockstar zinga cancer hnehtu ṭhenkhat an tarlang a ni. 

Megadeth dintu Dave Mustaine hi milar zinga cancer hnehtu hnaivai ber a ni awm e. Nikum June khan a hrawk a cancer thu a puang a, an tour neih tur leh an programme eng emaw zat ṭhulh a nih hnuah thla tam pawh a liam hmain a dam thu puan a ni lehnghal a ni. Nikum kum tawp lamah kha chuan stage-ah a kir leh tawh.

A bandmate Ronnie James Dio pumpui cancer vanga a chan aṭanga kum hnih a liam hnuah heavy metal legend Black Sabbath guitarist Tony Iommi chuan lymphoma a nei tih hriat chhuah a ni. Mahse ani pawh hi uluk taka enkawl a nih hnuah kum 2016-ah kha chuan a dinhmun a ṭhat tawh thu a puang leh ta a ni.

The Book of Souls recording an tih lai khan Iron Maiden vocalist Bruce Dickinson chuan a hrawkah harsatna a nei tih a hre chhuak a, a inentir hnu chuan cancer a vei tih hmuhchhuah a ni. Kum 2015 khan hrawk cancer avang hian enkawl a ni a, mahse tunah chuan a dinhmun a ṭha leh tawh hle a, zai lam pawh a chhunzawmna a rei leh tawh.

Eddie Van Halen hian kum 1999 khan 'hip replacement surgery' a paltlang a, a kum leh lawkah a lei a cancer tih hmuh chhuah a ni leh. Hun eng emaw chen enkawl a nih hnuah kum 2002-ah kha chuan cancer a hneh thu a puang leh thei ta a ni.

Rolling Stones drummer Charlie Watts pawh hi kum 2004 kha hrawk cancer vanga enkawl a ni a, a thih phah ṭep nghe nghe. Mahse uluk taka enkawl a nih hnuah cancer a hneh thu puangin a bandmate-te nen pawh hlate record ho lehin tour-te pawh an nei ho leh a ni.

Legendary singer Rod Stewart pawh hi cancer vangin ṭum hnih ngawt enkawl a ni tawh. Kum 2000 khan thyroid cancer vangin zai a tawk tawh a, zai a zir ṭhat leh vek a ngaih phah hian. A dam hnuah kum 2017 khan prostate cancer a nei leh tih nikum khan a puangchhuak leh a, mahse a sawi chhuah meuh hi chuan an lo enkawl dam leh der tawh.

Nergal     (Behemoth)

Phil Lesh     (Grateful Dead)

Vivian Campbell     (Def Leppard, ex-Dio)

Jay Jay French     (Twisted Sister)

Bret Michaels     (Poison)

Rikki Rockett     (Poison)

Peter Criss     (Ex-KISS)

Steven Sweet     (Warrant)