Hontrade Ṭhazual Lengzem ; Dj Lalvenhimi A hmun ngaiah a kir leh ta

Hontrade Ṭhazual Lengzem chart-ah a ber nihna vawi eng emaw zat lo hauh tawh Dj Lalvenhimi chu a hmun ngai, No. 1 ah a kir leh ta.

Dj-i hian 'A pawi emai' tih hla hmangin pakhatna a hauh a, tun lai lengzem hla thlan hlawh ber a ni mek. He hla hi John Hnamte phuah niin, April thla aṭang khan Zonet local channnel lamah pekchhuah ṭan a ni. Tun hnai khan MDM official YouTube channel-ah en theih tura upload a ni tawh bawk.

Dj-i hian Ṭhazual Lengzem chart-a record ṭha tak a lo neih tawh ṭhin chu a chhawm nung zel a, kuminah pawh a music video hmasa ber hmangin pakhana a hauh leh tawh a ni. Dj-i hian album thar a buaipui mek bawk.

Tun ṭum chart-ah hian mipa lam an che ṭha a, F. Zomuanpuia chuan pahnihna hauhin, H. Lalvulmawia chuan a dawt. Zomuanpuia hi 'Lo let leh la' tih hla hmangin top 3-ah a inhlang kai a, thiam taka 'Ka perhkhuang tingtang' tih hla satu Lalvulmwia pawh a sang zingah a lang zui zel bawk.

Idol star Mathlenga chuan hma sawn hret hretin, top 5-ah a inhlangkai a, 'Vanglai nun' tih hlain thlan a hlawh zui zel. Mathlenga hi Malsawmtluanga chuan a dawt a, pakhatna pawh lo hauh tawhtu Lalramdini Fanai chuan 'Mengmawi' tih hla a hlawhtlinpui zui zel.

Tun hnaia music video thar nena lo kir Manuna chu pasarihna a ni a, Isaac Chhangte leh Tommy L Pachuau bakah, Chama Thangluah te chu top 10-ah an lang bawk.