MYC Perhkhuang-a 5 thlan chhuah: Bawiha, Nunui, Priskil, Lilac, Daniel

State pawn thlenga zai thiam pho chhuah theih tur thlan fel an ni ta a, an kal zelna tur kawng pawh sah kuak sa a ni thawthang mai - Mizoram Youth Commission buatsaih MYC Perhkhuang Grand Finale chu Inrinni zanah khan ropui taka neih a ni a, zaithiam panga thlan chuah an ni.

Heng zaithiam panga - 1. R.Lalhruaitluanga (Bawiha), Vengsang, Champhai, 2. Lalhmangaihzuali (Nunui), Kulikawn, 3. Priskil Lalhmingsangi, Thingdawl Hmar Veng, 4. Lalhriatrengi (Lilac), Bawngkawn, 5. Daniel Lalawmpuia, Mission Veng te'n Rs. Nuai khat hu lawmman an dawn ṭheuh bakah MYC lamin an kalzelna tur a ngaihtuahsak dawn a ni.

MYC Perhkhuang Grand Finale hi Inrinni zanah khan Dawrpui Multipurpose Hall-ah neih a ni a, show a tir aṭanga hnehsawh taka host-tu Angelina Paul leh Mark V Vanlalrema-te chuan hnehsawh takin an kaihruai.

Intihsiaknaa tel ṭha zual 10 thlan chhuahte chuan performance hmuhnawm tak, beng titlai tak kalkhawmte an thlirin an ngaihthlak tir a, zaithiam rual an ni bawk a, beng a tlai takzet.

Heng mi 10-te hi Mizo, English leh Hindi hlate'n an intihsiak a, chung aṭanga a cheṭha zual mi pangate chu judge-te chuan thawhpui chhunzawm turin an thlang chhuak leh a ni.

Grand Finale-ah hian Sound From The Hills leh Sucheta Bhattacharjee, Centre of Creative Excellence, Mumbai-te pawhin performance hmuhnawm leh beng titlai tak an entir bawk.

Grand Finale zanah hian zaithiam panga thlan chhuahte chu an tlin thu puan a nih velah an zai nghal zel a, sap hla bakah Hindi hla leh Mizo hla sate pawh an awm a ni.