2021 GMA Dove Awards ; For King & Country-in Artist of the Year dawng

GMA Dove Awards vawi 52-na a award dawngtute chu Inrinni khan puanzar a ni ta a, pop duo chuan For King & Country award ngaihhlut Artist of the Year award an dawng leh.

October 19-a sem tawh, Inrinnia puanzar
Kristian rimawi huang chhunga award ngiahhlut GMA Dove Awards vawi 52 hi October 15 khan Allen Arena, Nashville, Tennessee-ah sem a ni daih tawh a, amaherawh chu Inrinni (an ram huna Zirtawpni zan) khan TBN chuan award semna ceremony hi a pe chhuak chauh a ni.

Jonathan McReynolds leh Natalie Grant chuan kumin GMA Dove Awards semna inkhawm hi an kaihruai a, Cece Winans leh Jason Ingram-te chu award dawng tam ber niin award pali ve ve an hum haw.

Award dawngtu langsarte chu
For King & Country chuan award ngaihhlut Artist of the Year award an dawng leh a, nikumah pawh khan he award hi an lo dawng tawh a ni.

We The Kingdom chuan Contemporary Christian Artist of the Year dawngin, CeCe Winans chuan Gospel Artist of the Year award a dawng bawk. NETFLIX film ' A Week Away' chu Inspirational Film of the Year award dawngtu a ni a, Maverick City Music chuan New Artist of the Year an dawng bawk.

Kari Jobe & Cody Carnes 'The Blessings' chu Song of the Year a ni thung.

Inlan an tha
We the Kingdom chuan performance hnunhnawm leh beng titlai tak hmangin kumin GMA Dove Award ceremony hi an khuh hawng a, anni bakah hian Christian artist tha tak tak an inlan a ni. Chung zingah chuan Brandon Lake, Cain, Elevation Worship, Matt Redman, Zach Williams leh Lauren Daigle-te pawh an tel.

Award semtute pawh an tha hlawm hle a, Brooke Ligertwood, Chris Tomlin, Joel Houston, Francesca Battistelli leh Anthony Brown tihte an ni hlawm.

Sawi hmaih theih loh Mizo naupangte
Kristiante bakah rimawi khawvelin a ngaihhlut Dove Awards semna tualzawlah hian Mizo hmel kan hmu ang tih tumahin kan ring phak ngai awm lo e. Kumin Dove Awards semna ceremony khuhhawnnaah erawh Mizo naupangte lam kan hmu tlat mai. Contemporary Christian Artist of the Year dawngtu We The Kingdom-te chuan 'God So Love' hmangin award sem inkhawm an ṭan a, an zai tawp lama rawn lam 'His Little Feet Choir'-te chu Mizo naupangte an ni a, Mizo thuamte inbelin an rawn lam a ni.