Mithiam te buaipui Hawaii tlangkang

Tun hnai khan kum 1983 hnua a vawi khat nan Hawaiian islands-ah tlangkang rapthlak tak a thleng leh a, a hmingah Kilauea volcano tih a ni. He tlangkang hi kar thum chung zet a awm ta a, Hawaii leh a chhehvela mihring chenna square mile li vel zet a khuh tawh a ni.

Mithiam leh zir bing mite chuan he tlangkang rapthlak tak hi an mutmawh hnarmawhah an nei mek a, a thlen chhan hrang hrangte an zir chaing mek. Kilauea volcano hi tlangkang chi thum - composite/strato, shield leh dome zinga pakhat shield vocano niin, hunbi pawh nei loa thleng thut active volcano a ni. Kilauea hi tlangkang ilo aṭanga lei sa tui lo irh chhuahna khur lian pui a ni a, hemi aṭang hian chirh sa tak mai a invawrh chhuak ṭhin a ni.

Kilauea aṭanga lava lo chhuahna hi Pu'U'Oo tih a ni a, heta ṭanga chirh sa lo irh chhuak hi metre sang chhuanga sangah te a invawrh chho thei a ni. He tlangkang hian tun hnai khan magnitude 4.4-a na lirnghing a siam a, tsunami erawh a la thlen lo a ni.

Hawaii civil defence lam pawhin mipuite chu fimkhur turin an chah chamchi a, tsunami pawh a thlen thei tih an sawi.

Mithiamte chuan Kilauea Volcano hian hlet 19 zet a nei tih sawiin, heta ṭang hian lava tam tak a invawrh chhuak a ni, an ti. Lava hian ram zau tak a chim tawh a, inkal pawhna leh inbika pawhna thlengin a ngawng buai tawh a ni.

He tlangkang hian chenna in 10 dawn a tichhe tawh a, mi tam tak chu hmun him lamah sawn chhuah tawh an ni. Pathinni khan nasa taka a thawh leh avangin thuneitute chuan emergency alert a tichhuak hial a, mipuite chu chiai lo turin an chah bawk.

Kilauea Volcano hi zirchian mek zel a ni a, lei chhung ril aṭnga lava lo irh chhuah dan chiang zawka hriat tumin an bei mek a ni.