India-ah Jurassic World tlangzarh a ni dawn

American actor Chris Pratt leh Bryce Dallas Howard te channa 'Jurassic World : Fallen Kingdom' chu June 7 hian India-ah tlangzarh a ni dawn. Hetih lai hian US-ah chuan June 22 aṭangin tichhuah a ni chauh ang.

Jurassic World hi khawvel huap chuan June 11 khian United Arab Emirates-ah tlangzarh a ni dawn a, hemi hma hian India-ah tichhuah a ni dawn tihna a ni. Hetih rual hian ram hrang hranga chhuah ṭan hun tur a inang lo viau a, sum tamna US lamah chuan June thla tawpah theatre-ah chhuah a ni chauh ang.

Hetih lai hian Indian film actor lar Rajinikanth channa 'Kaala' nen a chhuah hun tur a inang dawn thung. Jurassic World hi India bikah hian ṭum 2,300 chhuah tum a ni a, English, Hindi, Tamil leh Telugu ṭawngten tihchhuah a ni ang.

Jurassic Park film hmasa ber chu kum 1993 khan tichhuah a ni a, hemi ṭuma inlan Jeff Goldblum pawh tun ṭumah hian kan hmu leh dawn. American actor hi Fallen Kingdom-ah hian Dr Ian Malcolm lemah a chang leh dawn a ni.