Mystical Mizoram Ṭhazual Lengzem-ah Benjamin Sum pakhatna a ni ta
Mystical Mizoram Ṭhazual Lengzem chart-ah roreltu thar an awm a, chu chu tudang ni loin Benjamin Sum a ni. A hla hit 'Chhingmitin Biahthu Kan Hlan' chu Thazual chart lamah topper a nihpui ta.
'Chhingmitin Biahthu Kan Hlan' a mawi
He hla hi chu ṭhalai zingah chuan hla mikhual lo tak a ni. Tunṭum Ṭhazual chart topper hi chu kumin chhunga Lengzem hla hit ber pawl a ni a, chart topper a ni hi tumahin mak an tih a rinawm loh.
He hla hi zaithiam leh hla phuah thiam Rpa Ralte phuah niin thla nga vel liam taah khan Benjamin Sum hian lyrics video a tichhuak a, a hit nghal rem rem hle. YouTube lamah pawh rei lote chhungin thlirtu maktaduai an awm thuai a, tunah phei chuan lyric video hi thlirtu mtd 3.4 chuang fe an awm tawh!
Chutichuan, thla hnih vel liam ta khan Benjamin Sum hian official music video siamin MDM lamah a dahlut ta a, chu pawh chuan thlirtu nuai ruk chuang a nei leh der tawh a, thla hnih chhung velin chart topper-ah a rawn invawrh hman bawk.
He hla mawizia leh ṭhalaite duhzawng a nihzia sawi nawn a ngai loa, a satu Benjamin Sum pawh Lengzem singer zinga lawm hlawh ber pawl, Myanmar Idol a sang tak thleng thei a ni a, chart topper a ni pawh hi a inhmeh hle. Chart leh lamah he dinhmun hi a la luah thei dawn em hriat a chakawm viau bawk.
'Chhingmitin Biahthu Kan Hlan' hi kumin Ṭhazual Award sem turah pawh Song of The Year Category-a nomination hmu phak hla tlemte zingah a tel hial a, tin, a satu Benjamin Sum hi Best Male Artist Lengzem award dawng thei tur zingah a tel bawk a ni.
Pahnihna leh pariatna R. Lalruatkima
Mizo rilrem zawng tak, hla mawi tak tak leh ngaihno bei tak tak sa /hin R Lalruatkima chuan a hla mawi tak 'Nemte'n ka Chawi Nang Che' chu pahnihna a nihpui. He hla hi thla khat vel lek liam ta khan a tichhuak a, Chart-ah pahnihna a nihpui leh der tawh.
R Lalruatkima hla tho 'Lo Haw Thuai Thuai' chu chart-ah pariatna a ni mek bawk
Che ṭha zual dangte chu
Keimah Senes, Tlangval Tlumtea x Lil Me 'Thlabial Zan' chu pathumna a ni thung. Anni pawh hi Ṭhazual Award Best Group/Duo category-a lawmman la thei zingah an tel bawk a ni.
Mizo Idol star Marina Vanlalhriatpuii Varte 'Suakpuivungi Ruah Varpui Bang Theh' chu palina a ni a, Manuna chuan 'Thinlung Hliam' hmangin top 5 a khar thung.
Zaii Hauchhum chuan a hla thar 'Nunrual aurawl' chu parukna a rawn nihpui leh der tawh bawk a, Feli Fanai & Manuna 'Tuaktharte' pawh pasarihnaah rawn inhlangkaiin Ngurthansanga 'Sawmfang hmun mawi' chu pakuana a ni a, Jaui chuan a hla thar mawi tak 'Min Hmangaih Rawh' hmangin top 10 a khar a ni.