Friends star James Michael Tyler a thi

Khawvela sitcom lar ber zinga mi leh hlawhtling ber pawl 'Friends'-a Gunther lema chang James Michael Tyler chu kum 59 mi niin Pathianni khan a thi.

James Michael Tyler hi kum 2018 aṭang khan prostate cancer vangin enkawl a ni tawh a, Pathianni khan Los Angeles-a a chenna inah a thi ta a ni.

A thi tih thuchhuah siama tarlangtu Toni Benson chuan,"Khawvel chuan Gunther (the seventh 'Friend') tiin an hria a, a channa series hit 'Friends vang khan, mahse Michael-a laina hnaite chuan actor, musician, cancer-awareness advocate, leh pasal ṭha tak tiin an hre thung," tiin a tarlang.

1990's sitcom hit tak 'Friends'-ah khan season 10 tihchhuah a nih chhung khan episode 150 vel bawrah a lang a, 'Friends'-a a chanpuite leh mi langsar tak takin an ui thu social media lama an ziah hmuh tur a tam hle.

Michael Tyler hian kum 1995 khan Barbara Chadsey chu nupuiah neiin kum 2003 aṭang khan an awmhrang a, kum 2014-ah khan inṭhen felin kum 2017 khan Jennifer Carno chu nupuiah a nei leh a ni.

Film pangangaiah pawh paruk velah chuan Michael hi a inlan a, TV show-ah pawh 'Friends' bakah hian show dang pasarih velah inlan bawkin hmanni lawka tihchhuah 'Friends: The Reunion'-ah pawh khan a la inlan nghe nghe.