'Sawisel bo' Siampuii Ralte hla thar zaninah

Tleirawl zaithiam tak leh zei tak Siampuii Ralte chuan zanin dar 7-ah hian hla thar 'Sawisel Bo'chu a YouTube channel lamah a tichhuak dawn.

Siampuii hian ṭhangthar hla phuah thiam la tharlam tak Parmawi chu he hlaah hian a thawhpui leh a, a hmaa a hla mawi tak 'Thawnthu Tawp Thei Lo Tur' pawh kha Parmawi phuah nena thawkduna an tichhuah hi a ni a, chuvang chuan zanina a hla thar tihchhuah tur pawh hi a mawi leh viau ang.

"'Sawisel Bo' tih hla hi 'Thawnthu Tawp Thei Lo Tur' project kan buaipui laia ka sak tur liau liaua Parmawi min phuahsak niin, a tihchhuah hlan pawh kan nghakhlel hle a. Hripui boruakin harsatna tam tak a thlen avanga buaina neuh neuh kan tawh hnua kan rawn tichhuak thei tur hi kan lawm hle a ni," tiin Siampuii chuan a hla thar tihchhuah tur chungchang hi a sawi.

A hla phuahtu Parmawi chuan'Sawisel Bo' tih hla hi 'Thawnthu Tawp Thei Lo Tur' ang tho khan hla sak nuam tak a nih a rin thu a sawi ve bawk a, hmangaih leh duh em em neite tan phei chuan hla ngainatawm tak a nih leh a beisei.

Mizote hian kan lengzem hla tam zawkah hian inṭhenna lam te, a rûka mi va ngaihzawnna lam hla te, hmangaih chânna leh mi va chan lohna lam hlate kan ngah êm êm a, chutih laiin inhmangaih êm êmte inkar hriltu hla hi kan tlakchham lam nia hriain hetiang lam hla phuahah hian ṭhahnem a ngaih thu a sawi bawk.

'Sawisel Bo' tih music video hi MDM a Siampuii Ralte music video palina tur ni tawhin hla ṭha tak tak la rawn tihchhuah zel a tum a ni.

Siampuii hi Ṭhazual Award 2021 nomination list-a category pathum laia a hming lang thei a ni a, chu chuan mipuiin an lawmzia a tilang chiang awm e. Zanina a hla thar tihchhuah tur pawh hi a zai ngainatute tan chuan a ngaihnawm leh viauin a rinawm.