Billboard 200: Ariana Grande 'Positions' US-ah hralh a kal ber

Billboard 200 album chart-ah Ariana Grande album thar 'Positions' chu pakhatna a ni a, Trippie Redd 'Pegasus' chu pahnihna niin Pop Smoke 'Shoot For the Stars Aim For The Moon' chu pathumna a ni bawk.

Positions hi Ariana Grande studio album parukna niin October 30 khan a tlangzarh a, producer lar tak tak he album-ah hian Grande hian a thawhpui a ni.

Album a tlangzarh hma hian a album title track 'Positions' chu single-a tichhuakin '34+35' chu a album tlangzarh ni khan a tichhuak leh bawk.

Ariana hian a hmain US Billboard 200 chart-a No.1 album pali lai a lo nei tawh a, 'Positions' hmang hian panga a nei ta chiah a ni. US-ah chiah a tla na lo a, Canada, Ireland, New Zealand, Norway, leh United Kingdom-ahte pawh chart topper a ni.

Track 16 awmna 'Positions' hian album a tlangzarh aṭanga November 5 thleng khan stream maktaduai 117.9 lai a nei a, hei hi chart topper ni tura unit a hmuh chhuah tamna ber pawh a ni. Album sale 11.9k neiin song sales-ah 17k a hmu chhuak bawk a, a album equivalent unit hmuh chhuah chu 108.4k a tling hial.

Ariana hian a album tharah hian zaithiam dang thawhpui a nei nual a, tunlaia huhang ngah tak mai Doja Cat, the Weeknd leh Ty Dolla Sign-te thawhpuiin kumin chhunga hmeichhe album tlangzarh US Billboard 200 chart-a No.1 ni thei palina chiah a ni bawk.

Billboard chart No. 2 Trippie Redd 'Pegasus' hian kar hmasa Nilaini thleng khan album unit 55.6k a hmu chhuak a, stream maktaduai 74.3 a nei tling bawk a ni.

Pathumna chu chart hmasaa pathumna tho Pop Smoke 'Shoot For the Stars Aim For The Moon' a ni a, palina chu kar hmasa pathumna Luke Combs 'What You See Is What You Get' kha niin Sam Smith album thar 'Love Goes' chu pangana a ni thung.

Chart-ah lang thar an awm nual a, pakhatna, pahnihna leh pangana hi album thar an ni vek. Pasarihna Busta Rhymes 'ELE 2: The Wrath of God' pawh album thar tho niin pakuana Queen Naija 'Misundestood' pawh album thar a ni bawk.