Box Office: US-ah Let Him Go pakhatna a ni
Box Office-ah drama film Let Him Go chu pakhatna a ni a, Come Play chu pahnihna a ni ve thung. Global Box office-ah erawh Tenet bawk a la che ṭha chhunzawm.
US-ah Let Him Go hralh a kal
Kum 2013-a Larry Watson novel tlangzarh 'Let Him Go' movie-a siam chu US-ah hralh a kal ber a, kar tawp liam taah khan theatre 2,454 aṭangin $4,000,470 a lalut.
Let Him Go hi American neo-Western drama film a ni a, November 6 khan tlangzarh niin a changtute pawh an hrawl angreng hle. Lemchan lamah chuan veteran nia sawi phu ve tawh Diane Lane leh Kevin Costner-te channa a ni a, a hmuhnawm hle a ni ang, hrileng karah pawh $mtd 4 chuang a lalut thei tlat.
Critics lamin an fak angreng a, Rotten Tomatoes-ah phei chuan 6.80/10 rating mi 115 review aṭangin a hmu phak a, film hmuhnawm pangngai tak chu a nih hmel.
Come Play leh The War with Grandpa
Chart hmasaa pakhatna Come Play chu pahnihna a ni a, $1,793,080 a lalut a ni. Comedy film The War with Grandpa chu pathumna niin $1,506,484 a la lalut pha bawk.
Honest Thief chu palina a ni a, Tenet pawh US-ah $mtd lalut tling tawh lo mah se top 5-ah a la lang pha a ni.
Top 10-a lang zingah film thar The Informer a awm bawk a, pakuana a ni. Box Office Mojo lam chuan chart-ah film 38 lai a pholang ngam tawh a, hetah hian film kar hmasaa tlangzar thar pali a awm.
Ram dang leh khawvel puma che ṭhate
Film industry-te sum lakluhna bupui US-ah sum lengvak a tlem a, khawvel ram dang a hawi loh theih loh.
Christipher Nolan-a big budget film Tenet chu khawvel pum anga thlir chuan a che ṭha hle a, $mtd 350.8 a lalut tling der tawh. Heta ṭanga $mtd 40.3 chu IMAX aṭanga a lakluh a ni thung.
Japan-ah chuan Demon Slayer The Movie: Mugen Train a la che ṭha chhunzawm zel a, tlangzarh aṭangin ni 24 lai liam tawh mah se chart No.1 a la ni zel a, $mtd 200 a lalut tling der tawh. Japan film tihchhuah tawh zinga sum lalut tam pangana a ni pha tawh bawk.
China-ah pawh kar thum chhung The Sacrifice in ro a rel tawh a, $mtd 14.4 a la lalut phak a ni.