Mizo film thar 'MAKSAK' Lersia Play-ah a en theih ta

Mizo film thar dangdai tak, Mizo film industry-a kan la hmuh ngai zen zen loh Psychopath/Horror/Thriller/Suspense film 'Maksak' chu Lersia Play-ah en theihin a awm ta.

He film hi obG production kut chhuak a ni a, director chu Zonunkima (Kima_renthlei) niin, script ziaktu chu J. Lalrinsanga (Lai_Ril) a ni thung.

Film buatsaihtute chuan he film an siam dawn hian director leh script writer ṭangdun chuan budget tur pawh an nei lo tih sawiin, 'low budget' mai pawh ni lo, 'no budget'-a buatsaih kan ni, an ti hial. Mahse ṭhianṭha, vua leh vang ngam tlakte hnen aṭangin a rem ang ang pawt khawmin thi leh thau pawlh tak meuh meuha an sual chhuah a nih thu an sawi a, cast-te lakah pawh 'risk' lakpui turin an sawm hial.

Mizote'n kawng hrang hranga hma kan sawn mek lai hian kan film taste pawh a sang chho zel a, chuchu hriain, director leh script writer pawh hian he film 'Maksak' hi Mizo mipuite rualawhna kawng emaw zawng taka phuhrutu a lo nih theihna turin thlir theiha lo chhawp chhuah an tum ruh hle a ni. An theih tawp chhuahna hi hriatthiam pui a, Mizo mipuiten lo hlut sak a, lo thlir sak ṭheuh turin an ngen bawk a ni.

"Bena, a nu leh pa te'n anmahni pui tura thingtlang lama an chah chhoh chuan, an chhungkua pawhina rintlak ber ni tura an ngaih, Peka chu in nghah tirin, engkim a kut a dahin a kalsan a. Mahse, Peka lo khawsak dan chuan an chhungkaw lu a tihaiin a khawsa MAKSAK tak zet a ni!"

He film hi Zirtawpni zan aṭang khan Lersia Play-ah en theih a chhawp chhuah a ni a, en man pawh a to lo angreng hle. Quality hrang hrang a en theih niin en man chu:-

Highest Quality - ₹ 149.00

High Quality - ₹ 99.00

Medium Quality - ₹ 69.00

Low Quality - ₹ 49.00

Lersia Play hi, android hmangte tan Google play store aṭanga download mai theihin a awm a, IOS hmang ho tan erawh Safari/ Chrome aṭanga 'browse' a ngai thung.