Adele ropui takin a lo kir e Hot 100 leh Artist 100 chart-ah ro a rel nghal

Billboard Hot 100 leh Artist 100 chart-ah British singer Adele chuan kum eng emaw zat hnuah ro a rel leh ta a, Billboard 200 chart lamah erawh Young Thug album thar 'Punk' chu pakhatna a ni thung.

Billboard chart chung berah Adele hming kan hmu leh taKum 2015-16 chhoah khan Adele hian 'Hello' hmangin kar 10 lai Billboard Hot 100-ah ro a rel tawh. Chumi hnuah chuan a reh zui vang vanga, hla thar a tichhuak tawh lo bawk nen, Billboard chart lamah a hming hmuh tur a vang chho viau.

Tunhnaiah thawm eng eng emaw a rawn nei chho a, album thar a tichhuak dawn tih thawm a awm mek laiin a album thara a single hmasa ber ni turin October 15 khan 'Easy on Me' a tichhuak a, chu hla hmang chuan Billboard chart lamah a hmel rawn lan leh ṭanin chu hla chu kar hmasa chhunga US-a an hla ngaihthlak nasat ber a ni leh der tawh.

'Easy on Me' hi Hello hnua Billboard Hot 100 chart topper hla a neih leh hmasak ber mah ni se Hot 100 chart topper hla erawh Adele hian panga a neihna a ni chiah thung.

Hot 100 chart topper tur hian US-a official audio leh video stream zat bakah radio-a an play nasat dan leh sales data an en vek a, chung zawng zawng belhkhawmah chuan Adele 'Easy on Me' hi a che ṭha ber a ni.

Billboard Hot 100 chart history kum 63 zeta upa tawhah 'Easy on Me; hi chart topper 1,131-na a ni tawh niin Billboard chuan an tarlang a, kar hmasa chhung khan vawi maktaduai 53.9 zet stream hman a ni a, download 74,000 awm bawkin radio airplay audience impression mtd 65 vel zet a nei bawk niin MRC Data chuan a tarlang.

The Kid LAROI & Justin Bieber 'Stay' chu kar hmasa lama a dinhmun, pahnihnaah bawk a ding leh a, Lil Nas X & Jack Harlow 'Industry Baby' chu pathumna a ni thung.

Billboard 200 chart lamah Young Thug
Young Thug album thar 'Punk' chu Billboard 200 chart-ah pakhatna a ni a, album thar ṭha tak tak karah Young Thug album thar hi US-ah chuan kar hmasa chhung khan a hit ber a ni.

'Punk' hi Young Thug studio album pahnihna a ni a, he album hian artist ṭha tak tak- Drake, Travis Scott, Doja Cat leh midang eng emaw zatin puiin kar hmasa chhung khan US-ah he album hian ngaihthlak a hlawh ber a, 90,000 album-equivalent unit a hmu chhuak.

Drake-a album hit tak 'Certified Lover Boy' chu pahnihna a la ni phak a, Mac Miller album thar 'Faces' chu pathumna a ni thung. UK leh ram dang eng emaw zata che ṭha tak Coldplay album thar 'Music of the Spheres' chu US Billboard 200 chart lamah hian palina a ni phak ṭawk a ni.

The Beatles 'Let it Be' a rawn lang leh e
October 15-a tihchhuah The Beatles 'Let it Be' reissue chu Billboard 200 chart-ah pangana a ni. He album hi kum 1970 khan a vawi khatna atan tlangzarh niin, June 13 – July 4, 1970 khan kar li chhung Billboard 200 chart-ah hian pakhatna a lo ni tawh.

'Let it Be' hian EAU 55,000 a hmu chhuak a, chuta ṭanga 48,000 chu album hralhna aṭangin a ni a, Billboard 200 chart topper Young Thug 'Punk' ai pawhin album hi hralh hnem zawkin kar hmasa chhunga US-a album hralh kal ber a ni.

Kum 2010 khan Billboard 200 chart-ah hian 120-naah rawn inlan lehin chumi hnuah chuan a bo vang vang a, tun karah hian a rawn lang leh ta a ni.

Artist 100 lamah pawh Adele tho
Billboard Artist 100 chart topper pawh Adele bawk a ni a, kum 2016 hnua a vawi khatna atan Artist 100 chart lamah ro a rawn rel leh a ni.

The Bealtes chu Artist 100 chart-ah hian 55-na aṭangin pahnihnaah an rawn invawrh a, Drake chu pathumna a ni ve bawk.