'Dune' chhunzawmna 2023-ah tlangzarh dawn

Tunlaia film thawm nei ring tak 'Dune' chhunzawmna chu siam a ni dawn tih a chiang ta a, kum 2023-ah tlangzarh hman an tum.

Denis Villeneuve-a direct sci-fi movie 'Dune' hi Zirtawpni liam ta khan US lamah tlangzarh a ni a, Box Office lamah pawh rorel mekin film siamtu Legendary Entertainment lam chuan Twitter kaltlangin kum 2023-ah a chhun-zawmna an tichhuak dawn tih an puang.

Film star lar tak tak Timothee Chalamet, Zendaya, Rebecca Ferguson, Jason Momoa leh Oscar Isaac-te channa film 'Dune' kha production company lam chuan a bulṭanna chauh a nih thu sawiin, a chhunzawmna siam pawh an phur hle tih an sawi.

'Blade Runner 2049' leh 'Sicario'-te hlawhtling taka lo siam tawhtu Denis Villeneuve chuan Variety hnenah film pahnih anga siam chu a tir aṭanga a duhdan a nih sa reng thu a lo sawi tawh a, "Chhan eng emaw avangin a tirah chuan an remti loa, mahse, film hmasa siam phawta a hlawhtlin chuan a chhunzawmna siam leh ka cho a ni," tiin a lo sawi tawh.

'Dune' hian ram hrang hrang Box Office aṭangin $maktaduai 223.2 a hmu chhuak tawh a, kumin chhunga film hlawhtling ber pawl a ni der tawh a ni.