2021 MTV Europe Music Awards-ah Måneskin an inlan dawn

2021 MTV Europe Music Awards November 14-a sem turah Italian rock band, Eurovision winner Måneskin an inlan dawn a, anni bakah hian Maluma leh Kim Petras-te pawh an inlan dawn.

Eurovision Song Contest-a pakhatna an nih hnu khan Måneskin hian lawm an hlawh zui hle a, Billboard Global 200 Songs Chart-ah pakhatna an nihpui hla 'Zitti e buoni' chu an lanpui nghal a, Billboard rock chart-ah che ṭha ber ni chho nghalin tunah hian Billboard Hot 100 top 15-ah an lang pha mek. 2021 MTV Europe Music Awards-ah hian best rock leh best group category-ah nominee an ni bawk.

Nikum MTV VMA lama best Latin award latu Columbian singer Maluma pawh hi kumin MTV EMA-ah hian best Latin leh best Lat Am-central act, category-ah nominee a ni a, German pop singer Petras hian EMA stage a chuankai vawi khatna tur a ni bawk ang.

MTV hian Nilaini khan an award sem inkhawma inlan tur pathumte hi an puangzar phawt a, presenter, host leh inlan tur dangte pawh an la puang leh dawn a ni.

Kumin MTV EMA-ah hian Justin Bieber chu nomination hmu tam ber a ni a, pariat lai a hmu. Doja Cat leh Lil Nas X chuan dawtin paruk ve ve an hmu ve thung.

Papp László Budapest Sportaréna, Hungary-ah award semna hi an nei dawn a, fan-te chuan November 10 thlengin mtvema.com kaltlangin vote an thlak thei dawn a ni.