ABBA-in 'Voyage' hmangin min mangṭha dawn

ABBA chuan an album tihchhuah thar tur 'Voyage' hmangin rimawi khawvel an mangṭha tawh dawn tih an sawi.

Swedish pop group hian November 5 hian kum 40 chhunga an album hmasa ber 'Voyage' chu an tlangzarh dawn a, nakkum May thla hian Stratford, London aṭangin ABBA Voyage digital concert show an nei ṭan dawn bawk a, chumi zawh lamah chuan rimawi khawvel lam chu hawi an tum tawh lo niin a lang.

Benny Andersson leh Bjorn Ulvaeus-te chuan The Guardian-in an kawmnaah hemi chungchang hi sawiin, an project hmachhawp hi an zawh hunah chuan rimawi lam chu an luhchilh tawh dawn lo niin an sawi.

Benny chuan kum 1982 khan an chawl hlen tawh dawn tih a sawi loh thu sawiin, ABBA hi an bo hlen dawn tih ka la sawi ngai lo a, tunah erawh kan chawl tawh dawn tih ka sawi thung," a ti.

Agnetha Faltskog pawhin tunhnai khan an chawl hlen tawh dawn tih chu sawi dawt harsa ti mah se an upa tawh a, an hmalam hun tur sawi a har tawh thu a lo sawi tawh bawk a ni.