Japan-ah bike thlawk thei an tlangzarh

Japan company ALI Technologies chuan Nilaini aṭang khan bike thlawk thei, hover bike XTURISMO chu an zuar chhuak ta rup mai le.

Film lamah leh video ṭhenkhatah car thlawk thei tih vel chu kan hmu fo tawhin a rinawm a, mahse Japan lamah erawh chuan bike thlawk thei a takah hmuh tur a awm ta. ALI Technologies bike tlangzarh thar XTURISMO Limited Edition hi khawvela hover bike hmasa ber a ni a, $680,000 man vel a ni.

ALI Technologies chuan an bike thar hi vawi khat charge-ah minute 40 chhung a thlawk thei niin an sawi a, 100 km/h-a chakin a thlawk thei bawk niin an sawi. Nakkum kum laihawl velah hi chuan 200 siam hman an tum a, engine danglam tak a hmang hran lo niin an sawi bawk.

XTURISMO hi kg 300 vela rit a ni a, metre 3.7 vela sei niin a vang chu metre 2.4 a ni thung.

Bike thlawk thei siamtu company hian nakkum chawhma lamah hi chuan an bike hi an pe chhuak ṭan thei tawh dawn niin an sawi.