Mizo tlangval NDA graduate thar Lalrindika

National Defence Academy, Khadakwasla, Pune-ah nimin khan National Defence Academy 141st Course zote'n Passing Out Parade an nei a, chung zingah chuan Mizo tlangval Lalrindika a tel.

Lalrindika hi Dr. Lalrohlua (L), ENT Specialist leh Lalnuntluangi-te fa pathum zinga a naupang ber niin, Dawrpui Veng, Aizawl a khawsa an ni a, kum thar lamah Indian Army Officer training-na hmunpui ber, Indian Military Academy-ah kum khat training leh turin a lut ang. Chumi hnuah chuan Indian Army a Commissioned Officer niin, Lieutenant-in bul a ṭan dawn a ni.

Kum 2018 November-a UPSC buatsaih, NDA & NA Final Result-ah All India Merit List ah 55-na a ni phak a, January 2019 aṭangin NDA hi a zawm a ni. Kum thum chhung training paltlangin tunah hian hlawhtling takin NDA aṭang hian a rawn pass chhuak ta a ni. NDA-ah hian hnam dang val rual zingah pawh a duai lo hle a ni ngei ang, an Division bikah a hotu ber, Division Cadet Captain a ni phak hial bawk.