Zaninah Maruati hla thar 'Khûm ka nuam' YouTube-ah

Tunlai Gospel singer zinga a zai miin an ngaihthlak tam ber pawl Maruati chuan hla thar 'Khûm ka nuam' a tichhuak a, zanin aṭang hian a YouTube channel lamah duh hun hunah a hmeh chhuah theih tawh dawn.

Maruati hian a hla thar hi Ningani zan khan Zonet lamah chuan a tichhuak tawh a, TV lama thlira ngaithla hman lo tan YouTube lamah zanin aṭang chuan duh hun hunah a hla thar hi a ngaihthlak theih tawh ang.

Champhai nula Maruati hian tuna a hla thar hi Champhai lamah a buaipui deuh chawt a, music chu SM Recording neitu Ngurtea siam a ni a, video pawh Champhai lam kut chhuak bawk niin Milestone Picture shoot a ni bawk. Recording erawh chu HC Recording, Venghnuai lamah a nei thung a, Maenga harmonica play ngaihthlak tur a awm bawk.

'Khûm ka nuam' hi ama phuah a ni nghe nghe a, Maruati chuan, "He hla hi Champhai phaizawla chengkawl kan khawrh ṭuma ka dawn a ni a, phai buh chi tur hring nghalh te, mual bawk tê reuh tê tê bul vela ransa hrang hrangin chaw an pet lai te, chhum mawi lutuk a lo awm ka hmuhte khan Pathian an chawimawi em em hian ka hria a.

"Bible ka en chuan thil siam zawng zawng chunga leng leh ropui a siam kan ni a, mahse, keimah lam ka inen a, kei chuan siam ka nih ang tak hian Pathian ka chawimawi tawk lo hian ka hria. Ka nihna bak baka lan duh chang te, ka dinhmun ngeiah pawh lungawi loh ching. Pathian rorel danah pawh lo duhkhawp lo ve mai ṭhin ka nihnate ka inhmu uar uar a. Chuvangin thilsiamte’n Pathian an chawimawi dan hi khûm nal nal a, siam ka nihna ang taka Pathian chawimawi ka chakna thu hla a ka puanchhuahna a ni ber e," tiin a hla phuah dan Vanglaini a hrilh.

Maruati hian a music video thar hi a hla dawnna hmun ngeiah a shoot nghe nghe a, buh hrin hunlai ngeia shoot a duh bawk nen, kum khat dawn video shoot tur hian a nghak hial tih a sawi bawk.