Taylor Swift 'Reputation' tour a bawn Concert ṭum nga aṭangin $mtd 54 lalut

Taylor Swift hi music khaw­velah chuan mi 'pakhat' a ni kan ti lo thei lo. A hawina lam a piang mipuiin an hawi tih mai tur a ni a, 'Reputation' tour a nei ṭan chauh emaw kan tih laiin $mtd 54 zet a lalut leh der tawh. Hengte hi khawpui pangaa concert a neih aṭang chauh a lakluh a la ni!

Taylor Swift hian Billboard Hot Tour chart-ah pakhatna a hauh mek a, sum lakluh tam lamah American country singer Kenny Chesney a khum. Reputation stadium tour hi May 8 khan Phoenix, Arizona-ah a ṭan a, khawpui hrang hrangah concert ṭum nga a nei tawh a ni.

Swift leh record
Swift hian thla ruk chhung tour a nei dawn a, $mtd 400 zet a lakluh theih an beisei. ticket pawh a hralh ṭha hle a, concert a neih ṭum ngaah hian 398,000 zet a hralh tawh a ni. University of Phoenix Stadium-a a concert chhimtu khan record a tling hial a, tum khata sum lakluh tam lamah pawh American heavy metal band, Metallica sumlak luhzat $mtd 5.2 chu khumin record a siam bawk. Concert chhimtu tam lamah hian One Direction ten kum 2014-a record an lo siam tawh chu a khum a ni.

Country singer Taylor Swift hian kum 2015 khan 1989 world tour a lo nei tawh bawk a, May 11-12 a Levi Stadium, San Francisco-ah concert ṭum hnih a neih ṭumin ticket 107,550 zet a hralh chhuak. Heta ṭang hian $mtd 14 zet a lalut a, record a lo siam tawh hi khum thei dinhmun a ding mek bawk.

Swift-i'n May 8-25 chhunga a concert aṭanga a sum lakluh hi a tur hle a, la chhunzawm zel tur a nih avangin record sang pawh a siam belh zel a rinawm. May 18-19 khan Rose Bowl, Southern California-ah concert a nei a, zan hnih chhung hian $mtd 16.2 zet lalutin box-office record a siam.A concert chhimtu hi mi 118,000 zet an tling a, kumin chhunga concert chhimtu tam ber ṭum a ni.

American singer hian nikum November thla khan album 'Reputation' a tlangzarh a, hemi tih lar nana tour a neih mek hi mi nuia li dawnin an chhim tawh a ni.

Billboard Hot Tour chart thar berah hian Kenny Chesney chuan pahnihna a hauh a, May 16-26 chhunga ṭum nga concert a neih aṭangin $mtd 11.1 zet a lalut a ni. Pathumna chu Imagine Dragons niin, April 13 aṭanga May 19 inkar khan $mtd 2.5 an thwkchhuak a ni. Top 10 langte sum lakluh zat hi a inthlau hle a, Taylor Swift-i'n $mtd 54 zet a lakluh laiin, $mtd 1 lalut tling lo pawh an awm nawk a ni.