Country music legend Kenny Rogers a kal ta
American country music legend Kenny Rogers chu Zirtawpni, March 20 zanah khan Georgia-a a chenna inah kum 81 mi niin a thi.
An chhungkaw aiawh thupuangtu chuan a chenna inah hian thlamuang takin a thi tih a sawi. Covid-19 vanga harsatna hrang hrang a awm avangin a chhungte chuan mi tlemte nen a vuina hun an hmang dawn tih an sawi bawk a, vui hun tur tak erawh an la tarlang lo.
Rogers hian nupui panga a nei hman a, fa panga a nei bawk. Tuna a nupui Wanda Miller nen hian June 1, 1997 khan an innei a, fa phir an nei a ni.
Khawvelin Kenny Rogers a hre reng tawh ang
Kum 2015 khan music a chawlhsan dawn thu a sawi a, kum 2018 khan farewell tour neiin a hriselna ṭhat loh vangin a farewell tour pawh hi a zo thei lo a ni.
"Kum hnih liam ta chhung khan ka fan-te mangṭhana hun ka nei thei a, ka lawmin nuam pawh ka ti hle. Ka nuna hun ka hman chhoh zawng zawngah min thlawpin min tiphur ṭhin hle a, an chungah mumal takin lawmthu sawina hun ka la nei ngai lo. Anmahni vangin ka hlim ṭhin hle a ni," tiin khatih hunlai khan a sawi nghe nghe.
Kum 2017 khan Texas Country Music Hall of Fame-ah ziahluh a ni a, Country Music Association Awards-te pawh dawng tawhin kum 2013 khan Country Music Hall of Fame-ah ziahluh a ni bawk. Heng bakah hian chawimawina hrang hrang a dawng hnem hle a, Country music huangchhungah phei chuan award a dawng hnem hle.
Grammy award pawh pathum lai a dawng a, Academy of Country Music Awards phei chu pasarih lai a dawng a ni.
Islands in the Stream
Mizo tam tak rilruah chuan Kenny Rogers tih chuan rilruah Dolly Parton nena an sak 'Island in the Stream' kha rilruah a lo lang nghal ngei ang. 1970-80 velah khan hla tam tak tichhuakin lar tawh hle mah se 'Island in the Stream' vang khan a lar zual hle.
He hla hi Bee Gees phuah a ni a, Kenny Rogers leh Dolly Parton-te hian an sa lar a ni. Roger-a studio album Eyes That See in the Dark-a mi niin August 1983 khan single a tihchhuah a ni a, a hunlai khan a hit rem rem hle a, tun thleng pawhin he hla hi chu khawvelin a theihnghilh tawh lo ang. Island in the Stream hla awmchhung hi chuan Rogers hi theihnghilh a ni tawh lo ang.
p August 21, 1938-ah Houston, Texas, US-ah a piang.
p Kum 2013 khan Country Music Hall of Fame-ah lakluh a ni.
p Country music singer tia hriat lar ni mah se hla, genre hrang hrang a larpui hnem hle. Single hit 120 aia tam a nei.
p A dam chhung khan record maktaduai 100 chuang a hralh.
p Zirtawpni zanah khan a chenna in Sandy Springs, Georgia-ah kum 81 mi niin a thi.