Bka hun a inherchhuak

Mizo Idol star Lalbiakkima (BK-a) chuan kumin a vawi khat nan Hontrade International Ṭhazual Fakna chart-ah dinhmun sang ber a luah.

Bka hi hun eng emaw chen a reh hnuah kumtir lam khan hla thar nen a lo kir a, a hla hi 'Vanram' tih a ni. Pi Lalsangzuali Sailo (L) hla hmang ngei mai hian chart-ah pakhatna a hauh a, tunlai Pathian fakna hla ṭha ber te zinga ami a ni.

BK-a hi Mizo Idol thlan hmasak ber ṭum, kum 2007 khan a tel a, top 10-ah a inhlangkai a ni. Zai lamah talent nei ṭha bik a nih zia a lo pholang tawn ṭhin a, tunah pawh a la danglam lo.

Hetih rual hian hun eng emaw chen rimawi khawvelah a hmel hmuh tur a awm lo a, a lo kir leh hnuah erawh a zai ngainatuten an hlut tih chart aṭangin a lang chiang hle a ni.

Tun ṭum chart-ah hian R. Lalruatfeli (Mapuii) chuan pahnihna a hauh a, a ni pawh a larna rei deuh tawh mah se a la chuai lo tih a hriat. Mapuii hian 'Ka nun hnar kaitu' tih hla a hlawhtlinpui mek a, chart-ah pawh a lang zing ta hle. Pathmuna-ah hian 'Siamtu kutchhuak' tih hla mawi taka satu Seraphic Choir te an awm a, an ni pawh hi an mikhual tawh lo hle.

Alabasta te chu 'Aw pan mai rawh' tih hla hmangin top 5-ah an inhlangkai a, Zorinsanga Sailo hming a chuang vang bawk. Zorina hian chart-ah hian hun eng emaw chen chu dinhmun sang ber a lo luah tawh a, hniam lam pan ve bawk mah se a sang zual zingah kan hmu zui zel. Zorina hian 'Min hual reng ṭhin' tih hla hmangin mipui min awi a, a zai ngainatu an tam tih a chiang hle a ni. Tunlai gospel singer ṭha ber pawl Zorina zai hi ngaithlak a ninawm loh a, thlan hlawh ber ber zingah a tel zui zel pawh hi thil mak a ni lo.

Valtea chuan 'Ka fak a che' tih hla hmangin parukna a hauh ve thung a, Mi­riam Lalnundiki chuan a dawt. Mi­riami hian a hla hit 'Damna kim a ni' chu a hlawhtlinpui zel a, hmasawn zel turin a duhawm hle.

Dawrpui Vengthar nula Ruth CVL Muanpuii chuan pariatna a hauh a, 'Chenchilhtu Thlarau Thianghlim' tih hla nen chart-ah a inlar zui zel. Ruth-i hi chart-ah hian a mikhual tawh lo a, zawi zawiin hma sawn hret hret a ni.

Top 10-ah hian Mawitea, Machhani & Hriatchhungi te an lang ve leh bawk a, Mawitei Ralte chuan, 'Nghilhni I awm lo' tih hla hmangin hnu akhar a ni.