Jimi Hendrix leh Jimmy Page-te guitar lilam dawn

Guitar legend pahnih Jimi Hendrix leh Jimmy Page-te guitar chu charity atan lilam a ni dawn.

Music memorabilia auction company Gotta Have Rock and Roll chuan guitarist lar tak tak  Hendrix, Page, Duane Allman, Eric Clapton leh Keith Richards-te guitar chu midang ṭanpuina turin an lilam dawn tih an tarlang.

Jimi Hendrix guitar lilam tur hi 1967 electric guild Starfire V cherry guitar a ni a,  $250,000 vel aṭangin an zuar chhuak dawn a ni. He guitar hi kum 1968 May thlaa a concert-naa a hman a ni a, a la ṭha hle niin an sawi.

Jimmy Page-a guitar hi  Fender Stratocaster niin,  $150,000 velin an zuar chhuak ṭan ang. Page hian kum 1991 vel kha he guitar hi a hmang nasa hle. 

Allman-a Fender Coronado II guitar, Richard Gibson-a Flying V leh Clapton-a custom-made Taylor Sunburst-te chu an lilam dawn bawk.