Box Office-ah Solo: A Star Wars Story khum thei an la awm lo

Alden Ehrenreich leh Emilia Clarke te channa Solo: A Star Wars Story chu sum lakluh tam lamah khum thei an la awm lo a, a zawnin Box Office-ah No. 1 a hauh ta.

Solo hian tlangzarh karah $mtd 83.3 zet lalutin, Deadpool 2 chu sum lakluh tam lamah a khum a ni. Kar liamta chhung khan $mtd 29.29 a lalut leh a, sum lalut hnem ber a ni leh. Mahse a sum lakluh hi a tlahniam nasa hle a, 65% lai a tling a ni. Box Office aṭanga a sum lakluh hi $mtd 115.3 a tling tawh a, khawvel hmun hrang hrang aṭangin $mtd 264.2 zet a tling tawh a ni.

May 10-a tlangzarh Deadpool 2 chu sum lalut tam pahnihna a ni leh a, Solo: A Star Wars Story nen an sumlak luh zat a inthlau lo hle. Canadian actor Ryan Reynolds channa Deadpool 2 hian kar liamta chhung khan $23.3 a lalut a, a sumlakluh tawh zawng zawng chu $mtd 363.9 a ni.

Survival drama 'Adrift' chuan $mtd 11.5 lalutin, sum lalut tam pathumna a ni. June 1-a tlangzarh film hi theatre 3,015-ah chhuah a ni tawh a, a sum lakluh zat hi a pun chhoh zel a rinawm.

Avengers : Infinity War ropui zia tarlan a ni chamchi a, sum lakluh kawnga a chetṭhat zia hi sawi nawn fo a la ngai dawn. Infinity War hi kumina film chhuak tawh zingah chuan a chungnung lawr lak a, Box Office-ah pawh hun rei tak chhung chu ro reltu a ni. A ber nihna hauh pha tawh lo mah se, film chhuak thar tam takin an la tluk lo cheu.

Infinity War hian kar liam ta chhung khan Box Office aṭangin $mtd 16.5 a lalut a, hmundang aṭanga a lakluh te nen chuan $mtd 32.5 lai a thawk chhuak leh a ni. Hollywood super star rual - Robert Downey Jr., Chris Pratt, Chris Evans, Vin Diesel, Chadwick Boseman, Chris Hemsworth, Tom Holland leh American actress Scarlett Johansson te channa film hian $tld 1.9 zet a lalut tawh a ni. Kumina film chhuak tawh zingah sum lalut hnem ber dinhmun hauh mektu hian film tichhuah tawh zawng zawng zinga sum lalut tam palina a hauh mek bawk.

Comedy film Book Club chu a sum lakluh a tlahniam hret a, pangana-ah a awm. Comedy film dang Life of the Party chu pasarihnaah a tlathla ve bawk. Tun thla tira tihchhuah Upgrade chu top 10-ah a inhlangkai nghal a, sum lalut tam parukna a ni. Film chhuak thar dang Action Point bakah, Breaking In leh Action Point te chu sum lalut tam zual zingah an tel bawk.