Facebook buaina a la reh chuang lo!

Facebook hmangtute informa­tion lakchhuah a nih chungchanga buaina chuan reh lam a la pan thei meuh lo a, company CEO Mark Zuckerberg tan chuan lu haina tham a ni tawh ngei ang.

Thal hmasa lawkah Cambridge Analytica scandal a lar chiam a, company lam pawh an insawifiah chul a nih kha. Tunah pawh thuthar a awm leh ta a, Facebook hian com­pany ṭhenkhat chu data lak phalna an pe nia sawi a awm leh tawh.

New York Times chuan Face­book hian hardware manufacture 60 chuang zet te chu user data a share niin an tarlang a, chung zingah chuan Apple, Samsung leh Amazon te pawh an tel. Company lian tak tak Apple, Samsung leh Amazon te hming a lang tel hian Facebook hmangtute a barakhaih a, an sawi anga thil a thleng a nih chuan a him tawk lo hle dawn tihna a ni.

New York Times tarlan dan chuan heng hardware manu­fac­ture-te hi Facebook hmangtute hriatpuina leh remtihna tel lo a, an data pawimawh te lak phalsakna pek an ni.

Hemi chung­changah hian Federal Trade Commission pawh a inrawlh a, Face­book hian privacy setting a siamṭha tur a ni a, a hmangtute rem­tihna tel loa infor­mation lak hi dan kalh niin a tarlang.

Facebook-Cambridge Analy­tica data scandal hian nghawng a nei lian hle a, Facebook chief Mark Zuckerberg pawhin vawi eng emaw zat thupha a lo chawi tawh a ni. Company a din a china hun kirh ber an hmachhawn thu leh, mawhphurtu a nih thu a sawi lang fo bawk.

BBC chuan Facebook-Cam­bridge Analytica data scandal hian mi tluklehdingawn 1.1 vel a ngawng niin a tarlang a, US bakah, Philippines, Indonesia, UK, Mexico, Canada, India, Brazil, Vietnam leh Autralia-te pawh a nghawng niin an tarlang.

London Observer leh The New York Times-te chuan March 17 khan UK-a data firm Cambridge Analytica chuan personal infor­ma­tion tam tak an lakhawm tih an tarlang. He thil thleng avang hian privacy leh security setting a him tawk lo nia ngaihna a lian hle a, data leh information a putru ṭhin nia tarlan chungchang hian Facebook hmangtute ngaih a tiṭha lo hle a ni.

Data leak avang hian Wall Street-a Facebook stock pawh nasa takin a tlahniam nia sawi a awm bawk.