Mystical Mizoram Ṭhazual Gospel ; Chart chung berah Cindy Lalthanpuii 'I awm vangin'

Mystical Mizoram Ṭhazual Gospel chart-ah Cindy Lalthanpuii 'I awm vangin' chu pakhatna a ni. Angaihtei Hnialum 'Ka duh che' chu pahnihna niin Bee31 'A sawm che' chu pathumna a ni thung.

Chart chung bera awm 'I awm vangin'
Fela, Durtlang Leitan hla phuah dahkhawmna 'Pathian Hmangaihna' album a hlate Ṭhazual chart lamah a la hit chho zel a, tuna Cindy-i'n thiam taka a sak, chart-a pakhatna ni mek 'I awm vangin' tih pawh hi kha album-a mi bawk kha a ni.

He hla hi chart top 3-a a lanna a rei tawh a, chart hmasaah khan pahnihna niin tunah erawh dinhmun ṭha ber a rawn luah ve ta.

Cindy hian a sa mawiin a sa thiam hle a, music video pawh awmze nei tak leh hmuh nuam tak a ni. September thla laihawlah khan Cindy hian he hla hi a tichhuak a, YouTube lamah pawh thlirtu nuai dawn an awm der tawh.

Ṭhazual chart lama mikhual lo tak leh che ṭha ṭhin tak Cindy hian 'I awm vangin' hi chart topper a nih chhunzawm thei dawn em tih hriat a chakawm tawh a, chart-a langte an ṭha rual a, chart leha an dinhmun tur hriat a chakawm tawh viau mai.

Angaihtei leh Bee31
Chart hmasa lama pathumna Lalduhzuala Hnamte hla Angaihtei Hnialum-in thiam taka a sak 'Ka duh che' chu pahnihna a ni thung a, Angaihtei hian chart lehah dinhmun ṭha bera ding turin a dinhmun a sawh nghet sawt hle.

Rock band Bee31 'A sawm che' chu pangana aṭangin top 3-ah an rawn inhlangkai ve leh bawk a, anni pawh hian hma an sawn chak hle a ni.

Chart-a langte an ṭha hlawm, Stacy hla pahnih a lang
Amtea 'I tawk' chu palina a ni a, Christina Vanlalnghaki 'Thlan loh khawvel' chu top 5-ah a rawn inhlangkai ve bawk.

Ṭhazual award dawng thei tur zinga mi Benjamin Colney ft Jerry 'Mak tak leh hlauhawm taka duan' chu parukna a ni a, 10-na aṭangin paruknaah a rawn inhlangkai der a ni.

Stacy Punte hla 'Ka thlang ber zel ang che' leh 'Lalpa fakin' chu pasarihna leh 10-na a ni a, Sawmtea Chhangte leh Lalbiaktluanga (B tea)-te pawh chart-ah hian an lang bawk a ni.