Jenn Ralte 'Beiseina' zaninah

Jennie Lalruatfeli (Jenn Ralte) chuan hun eng emaw chen hla thar a tihchhuah tawh loh hnuah hla thar 'Beiseina' a tichhuak a, he hla hi zanin aṭangin YouTube lamah duh hun hunah a hmeh chhuah theih tawh dawn.

Jenn Ralte hian a hla thar hi Zonet lamah chuan Inrinni zanah khan a tichhuak tawh a, ama phuah niin Drew Records, Chaltlang-ah recording a ti a, video chu Moonshine Studio(Andrew) kut chhuak a ni thung. Music video-a MUA chu Teteii niin Phatbard Entertainment chuan 'Beiseina' hi an produce a ni.

"Harsatna tam tak ka tawh hnuah video kan ti chhuak thei a, kan lawm hle. He hlain a tum ber chu mi beidawng, khawvel lam emaw mihring lam emawa beiseina engmah nei tawh lote'n Pathian-ah beiseina a la awm a ni tih an lo hriat thar hi a ni.

"Mi tam tak mahni nunna lak mai duh khawpa sualin beidawnna hmanga a bum mekte'n Beiseina Pathianah an lo neih thara, chung thihna rapthlak tak tak ata chhanchhuaha an lo awm theih nan he hla hi Pathianin hmang se tih hi ka duh ber a ni. He video atana min puitu ka bandmate, Delta Sound leh Kulikawn YMA-te chungah lawmthu ka sawi," tiin Jenn Ralte chuan a hla thar chung­chang hi a sawi.