Bollywood film Mizoramah an chang ṭan ta

Mizorama a vawi khatna turin nimin lamah khan Lungleiah Bollywood film shooting an nei ṭan.

Bollywood film Mizoram lama an rawn chan hi webseries tur a ni a, hun eng emaw chen liam ta aṭang khan hmalak a ni a, nimin lamah khan bul an ṭan thei ta a ni.

Information and Public Relations Department leh Mizoram Film Forum chuan film mite pho chhuahna tur leh zau zawka Mizoram hriat a nih theih nan hun rei tak aṭang tawh khan kawng an lo zawng tawh a, a hlawhtlinna hmel hmuh theihin a awm ṭan ta a ni.

Lalawmpuia Khiangte, Mizoram Film Forum Chairman chuan shooting bulṭanna hi telpuiin, "Hei hi hmasawnna lian zawk kan neih theihna tura bul ṭanna a ni a, ṭhahnemngai takin in mawhphurhna hlen ang che u,"tiin film mite hnenah a sawi a, "Sorkarin hma min lakpui zel ang a, Bollywood lam aṭangin company dang pawhin rawn luh zel an la tum a, Mizoram Film Forum hian heti lamah hian state pawnlam mi tan nasa takin kawng kan hawnsak a ni," a ti bawk.

Thla hnih chhung shooting hi an nei dawn a, Lunglei, Aizawl, Ailawng Film City leh hmun hrang hrangah shooting hi December 28 thleng an nei ang.

Film shooting nei tur hian Mumbai lam aṭangin JAR Pictures-te an lokal a, mi 70 vel lokalin, nimin aṭang khan ngawrh takin hna an ṭan nghal a ni.

He series-ah hian Mizo lemchan thiam eng emaw zat an inlan dawn niin an sawi a, I&PR Minister Lalruatkima leh Director Pi Lallianpuii, MIS-te pawhin hlawhtling taka film an chan theihna turin duhsakna an hlan a ni.