Mood Station-in Music video thar tichhuak dawn

Mizo rock band ṭha ber zinga mi Mood Station chuan zanin hian music video thar 'Suangtuahna hmun' an tichhuak dawn.

'Suangtuahna hmun' hi an debut album, kum 2018-a an tihchhuah 'Mood Station'-a mi kha niin an vocalist Tpa phuah a ni a, recording leh music production zawng zawng hi home studio a Tpa produce vek a ni nghe nghe. Videography chu OBG production a ni a, R&M Enterprise (Marcusa Pa) sponsored niin, MV-ah hian Rosangpuii ( Thingtlang tlangval changtunu) kan hmu dawn a ni.

"Hla hi ṭum khata a thu leh thluk phuah zawh nghal hi ka nei ngai mang loa, chutiang zinga mi chu a ni. July 25, 2015-a Prophecy-a (Tpa band hmasa) kan bassist Walwala thihna avanga a hla hi lo piang a ni a, ka rilru tawt leh mangang lutuk ka tlanchhiatna atan a kan duan a ni ber mai. Depression ka hmachhawn dawn apianga ka rilru luahkhattu atan ka hman ṭhin a ni.

"A hla hi leilung mawina leh duhawmna va chen chungchang a nih ang ngeiin, Mizoram leilung nawm zia min hriatchhuah thar tir nasa hle a ni," tiin a phuahtu Tpa chuan a sawi.

Modd Station hi SEKI Inter Village Band Contest-2019 winner kha an ni a, nikum Chapchar Kut-a an perform phei kha chu pui tak a ni.

An hla thar hi MDM lamah an register fel tawh a, Zonet lamah zanin hian an tichhuak dawn a, YouTube lamah pawh thlira ngaihthlak tur a awm thuai ang.