Dune-in ro a rel chhunzawm
Kar hmasa chhungin film lian tham tlangzarh thar a awm lem lo bawk a, chart hmasa roreltu 'Dune' bawkin tun kar tawp Box Office-ah khan ro a rel chhunzawm.
'Dune' bawkin sum a lalut tam ber leh
Frank Herbert-a science fiction novel film-a siam 'Dune' chuan kartawp liam ta chhung khan North America Box Office-a sum lalut tam ber ani leh a, theatre 4,125 aṭangin $15,413,486 lai a lalut leh.
'Dune' hian North America Box Office aṭang ringawtin $69,284,718 a lalut tawh a, ram hrang hrang aṭanga a sum lakluh belhkhawm chu $293,684,718 a tling der tawh a, kumina film sum lalut tam pawl tak a ni der tawh.
Darkar hnih leh a chanve zeta thui film hi film review-tu lamin an fak hlawm hle a, kar hmasa lamah khan a chhunzawmna an siam dawn tih film siamtu lam pawhin tichiang tawhin October 2023-ah 'Dune' chhunzawmna chu tlangzarh hman an tum.
Timothée Chalamet, Rebecca Ferguson, Oscar Isaac, Josh Brolin, Stellan Skarsgård, Dave Bautista, Stephen McKinley Henderson, Zendaya, David Dastmalchian, Chang Chen, Sharon Duncan-Brewster, Charlotte Rampling, Jason Momoa leh Javier Bardem-te channa film hian ram hrang hrangah lawm a hlawh a, $mtd 165 senga an siam niin tunah hian an film budget chu chiang takin an khum tawh a ni.
Pahnihna leh pathumna pawh a la ngai
'Halloween Kills' bawk pahnihna ni lehin theatre 3,616 aṭangin $8,743,355 a lalut a, pathumna chu 'No Time to Die' niin $7,753,194 a lalut tawh a ni.
'No Time to Die' hian ram hrang hrang aṭangin sum a lalut tam tawh a, North America Box Office aṭangin $133,263,929 lalutin ram hrang hrang aṭanga a sum lakluh belhkhawm chu $606,735,929 a ni der tawh! He film hi kumin chhunga film tlangzarh zinga sum lalut tam pangana a ni der tawh a, Hollywood film bikah phei chuan 'F9' chiah a pha tawh lo.
Film thar a awm nual
Anime movie 'My Hero Academia: World Heroes' Mission' chu kar hmasa khan US leh Canada-ah tlangzarh a ni a, Box Office-ah palina ni phakin film review-tu lam pawhin an fak hle. He film hi kar tawp liam ta chhung khan theatre 1,581-ah chhuah a ni a, $6,403,286 lalut nghalin ram hrang hrang aṭanga a sum lakluh tawh zat chu $35,790,488 zet a ni tawh bawk.
Parukna 'Antlers' leh pasarihna 'Last Night in Soho' chu film thar a ni bawk. 'Last Night in Soho' psychological horror film a ni a, he film-ah hian Anya Taylor Joy pawh a chang a ni.
A Mouthful of Air (14), Heart of Champions (18), The Souvenir: Part II (22) leh Cicada (30)-nate chu film thar an ni bawk.
Venom sum lakluh a tam tawh
'Venom: Let There Be Carnage' chuan kar tawp liam taah khan $5,750,556 a lalut leh a, US-ah ringawt pawh $190,442,114 lalut tawhin a sum lakluh tawh zawng zawng chu $395,842,114 a tling tawh a, kumin chhunga film sum lalut tam pariatna a ni mek