CMT Music Award sem a ni ta ; Blake Shelton a ropui ber

Kum tina sem ṭhin CMT Music Award chu sem a ni leh ta a, American singer Blake Shelton tan ni chhinchhiah tlak a inher chhuak.

Bridgestone Arena, Nashville, Tennessee-ah milar tam tak an fuan khawm a, music khawvelin Bridgestone Arena lam a hawi ṭhuap a ni. Karen Fairchild, Kimberly Schlapman leh Jimi Westbrook ten award ceremony hi hnehsawh takin an host a, red carpet a lun hle bawk. Mimala langsar ber chu award pahnih dawngtu Blake Shelton a ni a, live perform hmuhnawm tak thlir tur a awm bawk.

Award dawngtute
2018 CMT Music Award-ah hian award pariat semchhuah a ni a, mipuiten vote hmangin an thlang a ni. Award ngaihlut hlawh pahnih - Video of the Year leh Male Video of the Year chu 'I’ll Name the Dogs' hmangin Blake Shelton-a'n a hui. Shelton hian nikuma music video a tichhuah hmangin chawimawina a dawng a, mi bik a nihzia a pho lang. Award ṭhahnem tak lo dawng tawh kum 41 mi Shelton tan thil thar ni tawh lo mah se, chawimawina dawn chu a la danglam hle tih a hmel aṭangin a hmuh theih. Female Video of the Year award chu Carrie Underwood kutah hlan a ni a, Little Big Town ten Group Video of the Year award an dawng ve thung.

Dan leh Shay ten Duo Video of the Year award an la a, Carly Pearce music video 'Every Little Thing' chu Breakthrough Video of the Year atan thlan a ni.

Tun hnia intuai thar leh mek Backstreet Boys leh Florida Georgia Line te chuan CMT Performance of the Year award na la a ni. Kane Brown leh Lauren Alaina te an inkawp fuh a, an hla hit 'What Ifs' chu Collaborative Video of the Year atan thlan a ni bawk.

Tute nge inlan?
Little Big Town te chuan CMT Music Award hi an khuh hawng a, boruak a nung nghal hle. Kelly Clarkson chu a che ṭha leh pek hle a, lawm pawh a hlawh hle.

The Voice superstar Blake Shelton chu perform zingah a langsar ber pawl a ni bawk a, 'Turnin’ Me On' tih hla asak laiin entu lam thawm a ring ṭha hle a ni. 'Cry Pretty' hla nen Carrie Underwood chuan dawhsan a rap a, a perform danglam takin mit leh beng a titlai tak zet.

Chris Stapleton chuan 'Millio­naire' a perform a, Florida Georgia Line te an che ṭha viau bawk. Little Big Town ten an award dawn lawm nan 'Summer Fever' tih hla entu mipui an hlui a, Jason Aldean leh Luke Bryan an che hit hle bawk.

The Backstreet Boys te chu a Bridgestone Arena-a mipui chawkhlimtu ber te zinga mi an ni. Tun hnaia an tihchhuah 'Don’t Go Breaking My Heart' nen stage-ah an luah lum a, an ropuina a la chuai lo tih an pholang ve bawk.