Chef lar Anthony Bourdain a thi

A eisiam thiam vanga khawvelin a hriat lar, Anthony Bourdain chu Zirtawpni khan France-a a hotel room-ah thia chhar a ni a, mahni intihlum nia tarlan a ni.

Anthony Bourdain hi kum 61 mi a ni tawh a, eisiam thiam a nih mai bakah writer lar tak a ni bawk a, TV Show lamah khawvel huapin a lar bawk.

A eisiam thiam avang hian Award pawh ṭhahnem tak a dawng tawh a, tunah hian CNN TV Show, 2013 aṭanga chhuah ṭan "Anthony Bourdain: Parts Unknown,"-ah host a ni bawk a ni.

Smithsonian phei chuan eisiam khawvela "the original rock star" a ti hial a, "the Elvis of bad boy chefs" tiin a ko bawk.

1999 khan New Yorker article, "Don't Eat Before Reading This" tih a ziak a, 2000 kumah khan best-selling book-ah thlan a ni nghe nghe.

A award dawn ṭhenkhat te:-

- 2001-ah Bon Appetit magazine in Food Writer of The Year-ah a thlang

- 2009 leh 2011 khan a show Anthony Bourdain: No Reservations chuan Creative Arts Emmy Award a dawng

- 2010-ah Honorary CLIO Award hlan a ni

- 2017 December khan Culinary Institute of America chuan Doctor of Humane Letters honoris causa in the Culinary Arts degree a pe