Kum 13 hnuah Louis Walsh-an X-Factor chhuahsan

Kum 65 zet a ni ve tawh a, thil awm lo tak pawh a ni tawh hran lo e.

Talent Show, X-Factor Judge zinga senior tawh ber Louis Walsh chuan X-Factor a chhuahsan tawh dawn thu a sawi.

He show-ah hian kum 13 chhung chu a lo inlan tawh a, Walsh chuan X-Factor-a a hun hman chhung chu 'fantastic' years a ti hial a, he show hi nuam a tiin a ngaihlu hle tih a hriat theih.

Walsh hi he show 2004-a ṭan a nih aṭang khan kum khat chiah a inlan lo a, a bak zawngah a inlan vek a ni. Show Production company Thames chuan he show hlawhtlin nana a hnathawh ropui tak avangin lawmthu an hrilh ve bawk.

Thames managing director Amelia Brown chuan Louis Walsh-an an show atana a hnathawh chu khum theih a ni lo tih a sawi a, kum tam tak kan show hlawhtlin nana a hnathawh avang hian kan lawm takmeuh a ni, tiin a lawmthu a sawi.

Walsh hian Ireland's Got Talent-ah erawh judge a la nih chhunzawm dawn tih a sawi thung.

Hetih lai hian X-Fac­tor-ah hian Simon Cowell a lo let leh dawn tih thawm a awm a, ani bakah hian judge thar pathum kan hmu dawn a nih hmel a, mahse tute nge an nih dawn tih erawh tarlan a la ni lo.

X-Factor 2018 Judge-te hnuaia audition hi London-a Wembley Arena-ah neih a ni dawn tih tarlan a ni tawh a, contestant 30,000 chuang­in ramchhung hmun hrang hrangah audition an nei tawh bawk.