Hot 100 chart-ah Adele bawkin ro a rel; Album 200 chart chung berah Drake a kir

Billboard Hot 100 chart leh Artist 100 chart-ah Adele bawkin ro a rel leh a, Billboard 200 chart lamah erawh Canadian rapper Drake 'Certified Lover Boy' chuan kar eng emaw zat hnuah ro a rawn rel leh.

Adele 'Easy on Me' bawk
Kar hmasa lamah khan Adele chuan a rawn comeback-na hla 'Easy on Me' chu Hot 100 chart topper a lo nihpui tawh a, tunkar chart-ah pawh he hla bawk hi chart chung berah a ding leh.

A album thar tur '30'-a a single hmasa ber, kum nga dawn hnuah hla thar a tihchhuah leh hmasak ber 'Easy on Me' hi October 15-a a tihchhuah kha a ni a, US mai bakah hian ram dang 22 laiah he hla hi single chart topper a ni a, chung zingah chuan an ram United Kingdom pawh a tel a, Australia, Canada, Denmark, Germany leh Italy-ahte pawh pakhatna a ni tawh bawk.

Adele hian a hla thar vang hian People's Choice Awards lamah pawh nomination pahnih- The Song of 2021 leh The Music Video of 2021 a hmu nghal ṭhawt a ni.

Billboard Hot 100 chart-ah hian The Kid LAROI & Justin Bieber 'Stay' chu pahnihna a ni leh a, Lil Nas X & Jack Harlow 'Industry Baby' chu pathumna bawk a ni leh.

Billboard 200 chart chung berah Drake a ding leh
Canadian rapper Drake studio album parukna, September 3-a tlangzarh 'Certified Lover Boy' chu Billboard 200 chart topper a ni leh.

Drake hian a album thar hi a tichhuah tirh khan Billboard 200 chart-ah hian topper a nihpui nghal a, record eng emaw zat a siam nghal. Chung zingah chuan album pakhat aṭanga US single chart-a hla lang tam ber pawh a tel a, a hla pakua lai a rualin Hot 100 chart top 10-ah a lanpui hial a nih kha!

Chart topper a nih tawh loh hnuah pawh top 5-ah chuan a inhamtang deuh char char a, kar hmasa lamah khan pahnihna niin tun karah phei chuan pakhatna a rawn ni leh ta a ni.

Morgam Wallen album 'Dangerous: The Double Album' chu pahnihna a ni thung. He album hi kar tam tak chhung chart topper ni thei a ni a, kar 42 lai Billboard 200 chart-ah hian lang tawhin kar hmasa lamah khan pariatna a ni a, tunah chuan pahnihna a ni leh der tawh. Doja Cat 'Planet Her' pawh pasarihna aṭangin top 3-ah a rawn inhlangkai ve bawk a, YoungBoy Never Broke Again 'Sincerely, Kentrell' chu palina niin Olivia Rodrigo 'Sour' chu panga a ni thung.

Artist 100 chart bih zuai ang
Artist 100 chart lamah pawh kar hmasa lama pakhatna Adele bawk pakhatna a ni leh a, Drake chu pathumna aṭangin pahnihnaah a rawn inhlangkai a, kar hmasa lama pasarihna Olivia Rodrigo pawh pasarihna aṭangin pathumnaah a rawn inhlangkai ve leh.

Ed Sheeran leh The Weeknd-te chu palina leh pangana an ni ve bawk.