TATA Motors-in Lalremsiami Altroz car an pe

TATA company chuan nimin khan India hockey player, Mizo nula Lalremsiami Hmar hnenah car thar, TATA Altroz The Gold Standard an pe.

TATA hian Tokyo Olympic-a India hmeichhe hockey team te chu car thar a pe ṭheuh a, an state ṭheuha TATA dealer kaltlangin heng car-te hi hlan ṭheuhin Lalremsiami pawh hian Aizawla TATA dealer, National Business Enterprises aṭangin Dealer Principal Paul Zothanpuia John hnen aṭangin car hi a dawng a ni.

Car thar hlanna inkhawmah hian dealership lam aṭangin Lalmuanpuii chuan thu a sawi a, "Ratan Tata-in a lo tiam tawh angin, Remsiami'n Tata Altroz a dawng tur hi kan lawmpui hle a, Gold medal an phu nia a hriat vangin TATA Altroz The Gold Standard kher a pe a ni," a ti.

Remsiami hi Transport department lam pawhin duksakna hlanna turin registration leh tihfel ngai engkim an tihfel sak nghal bawk. Transport department lam hian Mizorama a vawi khatna turin district dang aṭangin district dang motor registration Remsiami pual hian an ti hial. Aizawl aṭangin Kolasib district motor registration an tifel a ni.

Tokyo 2020 neih zawh takah khan Mizo nula Siami hi India tan player pawimawh leh ṭangkai berte zinga mi a ni a, medal la pha chiah lo mah se kumin Olympic-a India hmeichhe team thlen chin kha India tan chuan record ropui tak a ni.