YouTube Billion Views club-ah AC/DC ; I beisei loh deuh hla a ni daih mai thei

Hard rock legend, khawvela rock band lar ber pawl AC/DC YouTube's 'billion views club'-a an lut tih han hriat chu a mak vak lo mai thei, mahse YouTube lama 'billion views' an neih hmasak ber hla erawh mi tam tak beisei loh tak hla a nih a rinawm.

AC/DC tih hming han lamrik hi chuan rilruah 'Back in Black' leh 'You Shook Me All Night Long' tih vel a lo lang vat ṭhin, mahse 'billion views' an neihpui hla erawh 'Thuderstruck' kha a ni daih thung.

'Thuderstruck' hi kum 1990-a an tlangzarh tawh kha niin, Mizote zingah chauh ni lo, khawthlang lamah pawh an hla lar ber zinga mi a ni lo a ni ngei ang, Billboard meuh pawhin an news headline-ah 'AC/DC-in YouTube-ah Billion Views Club an zawm ve ta- I hla beisei nen erawh a ni lo' tiin an ziak hial.

Australian rocker-te hian Back to Black album-a an hla hit pahnih 'Back in Black' leh 'You Shook Me All Night Long'-te chu Billboard chart-a an thlen sanpui ber hlate niin mi tam takin an hmelhriatna hla leh rock chart lama che ṭha tak hla ni mah se, YouTube lamah chuan 'Thunderstruck' hi a hit zawk tlat mai.

Chumai a la ni lo, 'Highway to Hell,' 'Dirty Deeds Done Dirt Cheap' leh 'T.N.T.' tih vel ai pawhin 'Thunderstruck' hian thlirtu a ngah zawk fe a ni.

He hla hi kum 1990-a an tihchhuah The Razors Edge album-a mi kha niin an single hmasa ber a ni nghe nghe a, a hunlai khan lar viau tho mah se U.S. Billboard Hot Mainstream Rock Tracks-ah pawh 'Back in Black' leh 'You Shook Me All Night Long'-in an thlen chin a thleng pha lo a, pangana a ni pha ṭawk.

A music video chu David Mallet direct niin, kum riat liam ta. November 7, 2012 khan YouTube-ah dah a ni a, tunah chuan 'billion views' a nei ta a ni.

'Thunderstruck' hi a hunlaia an hla hit ber ni lo mah se Iron Man 2-ah khan film trailer leh commercial soundtrack-ahte an hmang a, Deadpool 2-ahte khan an hmang bawk a, chumi a nih avang chuan ṭhangthar zawk, YouTube era-a hun hmang mekte rilruah a tla na zawk a ni mahna!