Andrew-a 'Fakna hla' nen a lo kir e

Hunrei tak chhung music video thar a tihchhuah tawh loh hnuah Andrew Laltlankima chuan nizan khan music video thar 'Fakna hla' a tichhuak.

Andrew hian a pa damlohna avang leh in lam hna ṭul avangin hun eng emaw chen chhung chu hla thar a tichhuak tawh loa, tunah erawh chuan hla thar mawi tak nen rimawi khawvel rawn luhchilh lehin a music video thar hi One Vision Gospel Tv YouTube channel lamah thlira ngaihthlak theihin a awm reng tawh.

Tuna hla thar a rawn tihchhuah hi fakna hla a nih angin hla tho deuh at, Pathianin mihringte a Chhandamna a hlut zia puan chhuahna hla a ni a, Lalpa faka zai tura insawmna hla niin Andrew leh Siama phuah dun a ni.

Blue Wave Records, Chanmari West-ah recording chu a ti a, Blue Wave label hnuaiah a hla thar hi tichhuakin video chu SVP kut chhuak a ni thung.

A producer chuan, "Mizo hla tihhmasawn tumna he hla hmang hian a lian em em a, kan phak tawkah chuan hmasawnna pakhat chu kan chuangkaiin ka hria. Hnamdangin hma min sawn san zel mai a, Mizote pawhin hma i sawn ve zel ang u.

"Tunlaiah Mizo irawm chhuak Pathian fakna hla kan nei tlem em em mai a, ṭhalaite’n khawthlang lam zaithiam ho fakhlate letlingin an sa nasa em mai bawk a, eng anga mawi pawhin sa mah ila, lehlin a nihna hian a hlutna a ti bo niin ka hria. Mizo phuah ngei hmanga Pathian fak hla tihchhuah pawh hi midangte pawhin ching zui ve zel se ka duh a ni," tiin a ṭhahnemngaihna thu a sawi.

Andrew hian a music video tur hi a duh uluk a, Kolasib leh Aizawlah-te shooting neiin a kar tawn zak zak a, One Vision Gospel-te'n an ṭawiawm nasa hle a, an chungah pawh lawmthu a sawi a ni.

Blue Wave records nen hian hla dang pawh an buaipui mek a, chu pawh chu kumthar lamah hi chuan kan thlira kan ngaithlak hman a beiseiawm niin a sawi bawk.