7th Annual Ṭhazual Award ; Inlan turte a hriat kim ta Mit leh Beng a tlai dawn

Tun Ningani leh Zirtawpni zana sem tur 2021 Ṭhazual Award-a inlan turte a hriat kim ta a, inlan tur an ṭha dawn a, mit leh beng a tlai dawn tih a chiang.

Ṭhazual Award vawi sarihna hi nikum lam ang bawkin zan hnihin semna hun an buatsaih leh dawn a, a zan khatna, November 11-ah hian Gospel huangchhunga kumin chhunga che ṭhate hnenah award hlan a ni dawn a, zan hnihna, November 12 zanah Lengzem huangchhunga che ṭhate hnenah award hlan a ni dawn thung.

Gospel Award sem zana inlan turte chu
Tuna Ṭhazual Gospel chart-a che ṭha chho mek Angaihteii Hnialum a inlan dawn a, Mizo Idol star Mami Hnamte chu inlan dawn bawkin ani hi hun eng emaw chen rimawi khawvela kan hmuh loh hnuah tunhnaiah hla thar te neiin a rawn inlan chho leh ṭan a, a zai ngaihthlak hlan a nghahhlelhawm viau.

Remruata (Cultural Sulam) a inlan dawn a, tunlaia Fakna hla hit ber pawl leh Award dawng thei tura dinhmun ṭha taka ding mek 'Mak tak leh Hlauhawm taka Duan' pawh Jerry leh Benjamin-te'n an rawn inlanpui ngei dawn niin a lang.

Tunhnai kum hnih thum chhunga Gospel singer zinga sawm hlawh ber pawl Arini leh Cindy zai kan ngaithla dawn a, Bee31 rock band chu inlan tur zingah an tel bawk. Melody, Andrew K. Lalchhandama, Thawhlehnaniropuia leh Christina Vanlalnghaki/One in Christ-te pawh an inlan dawn.

Lengzem lam ve thung ; RDi pualin Gnie leh Jaui
Zirtawpni hian Ṭhazual Lengzem Award sem a ni dawn a, tunlaia lengzem artist ṭha tak tak awmkhawmna MDM chuan an artist ṭha ber ber hemi zan hian stage luah turin an vawrh chhuak dawn.

Tleirawl zaithiam, tunlai ṭhalaite'n a zai an lawm em em Siampuii Ralte a inlan dawn a, 'Kan Khua' hitmaker Rebecca Lallawmsangi pawh kan hmu dawn. Chumai a la ni lo, Myanmar Idol star Benjamin Sum a inlan dawn a, 'Summers'-te tan chuan Zirtawpni zan hi zan nghahhlelhawm a ni ngei ang.

Hla phuah thiam leh zaithiam ni bawk JT Production chu inlan tur zingah a tel a, tunhnaia hla hlui ṭha tak tak mawi taka rawn thar thawh lehtu R Lalruatkima a zai dawn bawk. Zaii leh Lateii zai ngaihthlak tur a awm a, Jenny Zathang pawh hemi zanah hian kan hmu dawn a ni. Mathlenga zai ngaihthlak tur a awm dawn a, rock band lamah chuan 'Nghilh a har' hitmaker Shai Hills an inlan dawn thung.

Sawi hmaih theih loh tur chu April thlaa boral ta, Mizo hmeichhe rapper hmasa ber zinga mi RDi 'Ladylicious' pualin Gnie leh Jaui an inlan dawn. Mizo rapper huhang ngah ber zinga mi Gnie leh lengzem artist ṭha ber zinga mi Jaui te inlan dun tur ringawt pawh hi Ṭhazual award sem hun nghahhlehna tham a tling awm e.

Gospel artist inlan turte

1. Angaihtei
2. Mami Hnamte
3. Remruata (Cultural Sulam)
4. Jerry & Benjamin
5. Arini
6. Cindy
7. Bee31
8. Melody
9. Andrew K. Lalchhandama
10. Thawhlehnaniropuia
11. Christina Vanlalnghaki

Lengzem artist inlan turte

1. Siampuii Ralte
2. R. Lalruatkima
3. Benjamin Sum
4. Rebecca Lallawmsangi
5. JT Production
6. Zaii Hauchhum
7. Latei
8. RDi pual (Gnie & Jaui)
9. Shai Hills
10. Mathlenga
11. Jenny Zathang