Band pasarihin final an lut June 14 zanah final dawn

Chanmari Branch YMA-te'n an Diamond Jubilee puala Inter-Branch YMA Beat Contest an buatsaih chu a hmawr bawk a hnai ta a, final lut band pasaih te pawh puan a ni ta.

Inter-Branch YMA Beat Contest final hi June 14 zan khian Chanmari YMA Hall-ah neih a ni dawn a, band pasarih-te hian a ṭha ber nih tumin an intihsiak dawn a ni. June 7 & 8 zan khan final lut tur zawnna hi neih a ni a, band 15 an inlan. A cheṭha zual veng pasarih ten final hi an lut ta a ni. Final lut te hi - Tuikual South, Ramhlun North, Kanan, Dawrpui, Vaivakawn, Electric Veng leh Soron te an ni.

Inter-Branch YMA Beat Contest-ah hian Branch hrang hrang aṭangin band 21-in hming an pe lut a, June 4 khan elimination round neih ṭan a ni. Intihsiak hi Chanmari YMA Hall-ah neih ṭhin a ni a, second round aṭangin Zonet leh LPS te chuan live-in an pechhuak a ni. A hmunah a duh a piang tan chhim theih a ni bawk.

Lawmman lam hi
Beat Contest-ah hian lawm­man ṭha tawk tak siam a ni a, pakhatna aṭanga pangana thleng bakah, mimal lawmman siam a ni bawk. Pakhatna hian pawisa fai Rs.1,00,000 an dawng dawn a, pahnihnain Rs.50,000 leh pathumna ten Rs.30,000 an dawng ang. Palina leh pangana ten Rs.10,000 ve ve an la dawng dawn cheu bawk.

Mimal lawmman pawh ṭha tawk tak siam a ni a, Best Vocalist, Best Guitarist, Best Bassist leh Best Keyboardist bakah, Best Drummer thlan a ni dawn bawk.